ഡെറാഡൂൺ: ഹരിദ്വാറിൽ വർഷങ്ങൾ പഴക്കം ചെന്ന ആൽമരം കടപുഴകി വീണ് വിനോദ സഞ്ചാരി ഉൾപ്പെടെ രണ്ട് പേർ മരിച്ചു. നിരവധി പേർക്ക് പരിക്കേറ്റു. ജ്വാലാപൂരിൽ അൻസാരി മാർക്കറ്റിന് സമീപത്ത് നിന്നിരുന്ന മരമാണ് വീണത്.
ഇന്നലെ വൈകീട്ടോടെയായിരുന്നു സംഭവം. ശക്തമാറ്റ കാറ്റും മഴയുമായിരുന്നു ഇന്നലെ വൈകീട്ട് സ്ഥലത്ത് അനുഭവപ്പെട്ടത്. ശക്തമായ വീശിയടിച്ച കാറ്റിൽ മരം കടപുഴകി വീഴുകയായിരുന്നു. സംഭവ സമയം മരത്തിന് ചുവട്ടിലും പരിസരത്തുമായി നിരവധി പേരാണ് ഉണ്ടായിരുന്നത്. ഇവർ മരത്തിന് അടിയിൽ പെടുകയായിരുന്നു.
വിവരം അറിഞ്ഞ് ഫയർഫോഴ്സ് എത്തി മരച്ചില്ലകൾ മുറിച്ച് മാറ്റിയ ശേഷമാണ് ആളുകളെ ആശുപത്രിയിലേക്ക് മാറ്റിയത്. സംഭവത്തിൽ വിനോദ സഞ്ചാരിയുൾപ്പെടെ അഞ്ച് പേർക്ക് ഗുരുതരമായി പരിക്കേറ്റിരുന്നു. ആശുപത്രിയിൽ എത്തിച്ച ശേഷമായിരുന്നു ഇതിൽ രണ്ട് പേർ മരിച്ചത്. ബാക്കിയുള്ളവർ ആശുപത്രിയിൽ ചികിത്സയിലാണ്. പരിക്കേറ്റവരുടെ എണ്ണം വ്യക്തമല്ല.
സോനിപത് സ്വദേശിയാണ് മരിച്ച വിനോദ സഞ്ചാരി. മറ്റൊരാൾ പ്രദേശവാസിയാണ്. ഇവരുടെ മൃതദേഹങ്ങൾ ആശുപത്രിയിൽ സൂക്ഷിച്ചിരിക്കുകയാണ്. കടപുഴകി വീണ ആൽമരത്തിന് 200 വർഷം പഴക്കമുണ്ടെന്ന് അധികൃതർ അറിയിച്ചു.
