ബീജിംഗ്: കടക്കെണിയിൽ നിന്നും രക്ഷനേടാൻ ഓൺലൈൻ മദ്യപാന ചലഞ്ചിൽ പങ്കെടുത്ത ചൈനീസ് യുവാവിന് ദാരുണാന്ത്യം. 27 വയസ്സുകാരനായ ലൈവ് സ്ട്രീമർ ഷോംഗ് യുവാൻ ഹുവാംഗ് ഗെ ആണ് മരിച്ചത്. അമിതമായ അളവിൽ മദ്യം ഉള്ളിൽ ചെന്നതാണ് യുവാന്റെ മരണകാരണമെന്ന് ന്യൂയോർക്ക് പോസ്റ്റ് റിപ്പോർട്ട് ചെയ്യുന്നു.
ജൂൺ 2നായിരുന്നു, ലൈവിൽ യുവാൻ അമിതമായ അളവിൽ മദ്യപിച്ചത്. ഒരു മാസത്തെ ഇടവേളയിൽ ചൈനയിൽ ഇത്തരത്തിൽ മരണപ്പെടുന്ന രണ്ടാമത്തെയാളാണ് യുവാൻ. സാമൂഹിക മാദ്ധ്യമത്തിൽ ഒന്നേമുക്കാൽ ലക്ഷത്തിലധികം ആരാധകരുള്ള ലൈവ് സ്ട്രീമറാണ് ഇദ്ദേഹം.
35 മുതൽ 60 ശതമാനം വരെ ആൽക്കഹോൾ കണ്ടന്റുള്ള വീര്യം കൂടിയ മദ്യമായ ചൈനീസ് ഫയർവാട്ടറാണ് ഇയാൾ കണക്കില്ലാതെ അകത്താക്കിയത്. ശുദ്ധമായ മദ്യത്തിൽ തീ പിടിപ്പിച്ച ശേഷം യുവാൻ ഇത് വിഴുങ്ങുന്ന വീഡിയോ സാമൂഹിക മാദ്ധ്യമങ്ങളിൽ വൈറലാണ്. പശ്ചാത്തലത്തിൽ ഒഴിഞ്ഞ നിരവധി മദ്യക്കുപ്പികളും കാണാം.
യുവാൻ കടുത്ത സാമ്പത്തിക പ്രതിസന്ധി നേരിട്ടിരുന്നതായി ഭാര്യയും സുഹൃത്തുക്കളും വ്യക്തമാക്കി. ഇതിൽ നിന്നും രക്ഷപ്പെടുന്നതിന് വേണ്ടിയായിരുന്നു അപകടകരമായ ഈ പരിശ്രമത്തിന് അയാൾ മുതിർന്നതെന്നും ഇവർ അറിയിച്ചു.
ഇതേ മത്സരത്തിൽ പങ്കെടുത്ത് മെയ് 17ന് മറ്റൊരു ചൈനീസ് സോഷ്യൽ മീഡിയ സ്ട്രീമർ വാംഗ് മൗഫെംഗും മരണപ്പെട്ടിരുന്നു. യുവാന്റെ സുഹൃത്തായിരുന്നു ‘ബ്രദർ ത്രീ തൗസൻഡ്‘ എന്ന അപരനാമത്തിൽ അറിയപ്പെട്ടിരുന്ന മൗഫെംഗ്.
Discussion about this post