ഫ്രഞ്ച് ഓപ്പൺ കിരീടം ജ്യോക്കോവിച്ചിന്; 23 ഗ്രാൻഡ് സ്ലാമുകൾ; നദാലിനെ മറികടന്നു

പാരീസ്: ഫ്രഞ്ച് ഓപ്പൺ ടെന്നീസ് കിരീടം സെർബിയൻ താരം നൊവാക് ജ്യോക്കോവിച്ചിന്. നോർവ്വീജിയൻ താരം കാസ്‌പെർ റൂഡിനെ പരാജയപ്പെടുത്തിയാണ് കരിയറിലെ 23 ാം ഗ്രാൻഡ് സ്ലാം കിരീടം ജ്യോക്കോവിച്ച് നേടിയത്. ഇതോടെ ഏറ്റവും കൂടുതൽ ഗ്രാൻഡ് സ്ലാം കിരീടങ്ങൾ നേടുന്ന താരമായും ജ്യോക്കോവിച്ച് മാറി.

22 ഗ്രാൻഡ് സ്ലാമുകളുമായി റാഫേൽ നദാലിന്റെ റെക്കോഡിനൊപ്പമായിരുന്നു ജ്യോക്കോവിച്ച്. ഇതാണ് ഇപ്പോൾ മറികടന്നത്. മൂന്നാം തവണയാണ് റോളണ്ട് ഗാരോസിൽ ജ്യോക്കോവിച്ച് കിരീടം നേടുന്നത്. കടുത്ത പോരാട്ടമായിരുന്നു നടന്നത്. 7-6 (7-1), 6-3, 7-5 എന്ന സ്‌കോറിനായിരുന്നു വിജയം.

നാല് ഗ്രാൻഡ് സ്ലാമുകളും മൂന്ന് തവണ നേടുന്ന ആദ്യ താരമായും ജ്യോക്കോവിച്ച് ഇതോടെ മാറി. കൈവിട്ടുപോയ ഒന്നാം നമ്പർ റാങ്കും ഈ വിജയത്തോടെ ജ്യോക്കോവിച്ച് തിരിച്ചുപിടിച്ചിരിക്കുകയാണ്.