പാലക്കാട്:പ്രസവ ശസ്ത്രക്രിയയ്ക്ക് ശേഷം യുവതിയുടെ ശരീരത്തിനുള്ളിൽ പഞ്ഞിക്കെട്ട് മറന്നുവച്ച സംഭവത്തിൽ ആശുപത്രിയ്ക്കെതിരെ കേസ് എടുത്തു. പാലക്കാട്ടെ പാലന ആശുപത്രിയ്ക്കെതിരെയാണ് കേസ് എടുത്തത്. യുവതിയുടെയും കുടുംബത്തിന്റെയും പരാതിയിലാണ് നടപടി.
സംഭവം വാർത്തയായതോടെ രാവിലെയാണ് പോലീസ് കേസ് രജിസ്റ്റർ ചെയ്തത്. ഇന്ത്യൻ ശിക്ഷാ നിയമത്തിലെ 337ാം വകുപ്പ് പ്രകാരമാണ് നടപടി. ഇന്ന് തന്നെ ആശുപത്രിയിൽ എത്തി പോലീസ് വിവര ശേഖരണം നടത്തും.
മേപ്പറമ്പ് സ്വദേശിനി ഷബാനയുടെ ശരീരത്തിലാണ് പഞ്ഞിക്കെട്ട് മറന്നുവന്നത്. ആശുപത്രിയിൽ നിന്നും ഡിസ്ചാർജ് ആയി വീട്ടിലെത്തിയ ശേഷം ആയിരുന്നു സംഭവം അറിഞ്ഞത്. മൂത്രമൊഴിച്ചപ്പോൾ പഞ്ഞി പുറത്തേക്ക് വരികയായിരുന്നു. ഇതോടെ ഷബാനയും കുടുംബവും പരാതിയുമായി പോലീസിനെ സമീപിച്ചു. ശസ്ത്രക്രിയക്ക് ശേഷം കടുത്ത വയറ് വേദന അനുഭവപ്പെട്ടിരുന്നുവെന്നാണ് യുവതി പറയുന്നത്. ഇക്കാര്യം ഡോക്ടറെ അറിയിച്ചിരുന്നു. എന്നാൽ ഇത് ഗൗരവമായി എടുത്തിരുന്നില്ലെന്നും യുവതി വ്യക്തമാക്കി.
അതേസമയം ശസ്ത്രക്രിയ നടത്തിയതിൽ വീഴ്ചയുണ്ടായിട്ടില്ലെന്നാണ് ആശുപത്രിയുടെ വാദം. അമിത രക്തസ്രാവം തടയുന്നതിന് വെച്ച ജെൽ ഫോം ആണ് പുറത്തേക്ക് വന്നതെന്നാണ് ഡോക്ടർമാർ പറയുന്നത്. എന്നാൽ ജെൽ ഫോം വച്ച വിവരം ആശുപത്രി അധികൃതർ പറഞ്ഞിരുന്നില്ലെന്ന് ഷബാനയുടെ കുടുംബം പ്രതികരിച്ചു.
Discussion about this post