കശ്മീരിൽ തുടർച്ചയായി മൂന്ന് ഭൂചലനങ്ങൾ; ആശങ്കയിൽ ജനങ്ങൾ

ശ്രീനഗർ: ജമ്മു കശ്മീരിൽ വീണ്ടും തുടർച്ചയായി ഭൂചലനങ്ങൾ. ഇന്ന് രാവിലെ രാവിലെയോടെ മൂന്ന് തവണയാണ് ജമ്മു കശ്മീൽ ഭൂചലനം അനുഭവപ്പെട്ടത്. സംഭവത്തിൽ ആളപായം ഉണ്ടായിട്ടില്ലെങ്കിലും തുടർച്ചയായുണ്ടാകുന്ന ഭൂചലനത്തിൽ വലിയ ആശങ്കയിലാണ് പ്രദേശവാസികൾ.

കശ്മീരിലെ കത്ര, ദോഡ എന്നീ മേഖലകളിൽ ആണ് രാവിലെയോടെ ഭൂചലനം അനുഭവപ്പെട്ടത്. പുലർച്ചെ 2.20 നായിരുന്നു ആദ്യ ഭൂചലനം ഉണ്ടായത്. ഇത് റിക്ടർ സ്‌കെയിലിൽ 4.3 തീവ്രത രേഖപ്പെടുത്തി. കത്രയിൽ നിന്നും 81 കിലോ മീറ്റർ മാറി 10 കിലോ മീറ്റർ ആഴത്തിലാണ് ഭൂചലനത്തിന്റെ പ്രഭവ കേന്ദ്രമെന്നാണ് റിപ്പോർട്ട്.

ഇതിന് ശേഷം രാവിലെ 7.56 ഓട് കൂടിയാണ് ഇവിടെ രണ്ടാമത്തെ ഭൂചലനം അനുഭവപ്പെട്ടത്. റിക്ടർ സ്‌കെയിലിൽ 3.5 തീവ്രത രേഖപ്പെടുത്തിയ ഭൂചലനം ആയിരുന്നു രണ്ടാമത് റിപ്പോർട്ട് ചെയ്തത്.

രാവിലെ 8.29 നായിരുന്നു ജമ്മു കശ്മീരിൽ മൂന്നാമത്തെ ഭൂചലനം അനുഭവപ്പെട്ടത്. റിക്ടർ സ്‌കെയിലിൽ 3.3 തീവ്രത രേഖപ്പെടുത്തിയ ഭൂചലനം ആയിരുന്നു ഇത്. തുടർച്ചയായി മൂന്ന് ചലനങ്ങൾ അനുഭവപ്പെട്ടെങ്കിലും നാശനഷ്ടവും റിപ്പോർട്ട് ചെയ്തിട്ടില്ല.

ഇന്നലെ വൈകീട്ട് ദോഡയിൽ റിക്ടർ സ്‌കെയിലിൽ 5.4 തീവ്രത രേഖപ്പെടുത്തിയ ഭൂചലനം അനുഭവപ്പെട്ടിരുന്നു. ഇതിന് പിന്നാലെയാണ് തുടർച്ചയായി മൂന്ന് ഭൂചലനങ്ങൾ കൂടി ഉണ്ടാകുന്നത്. ഇന്നലെയുണ്ടായ ഭൂചലനത്തിൽ നിരവധി വീടുകൾക്കും കെട്ടിടങ്ങൾക്കുമാണ് കേടുപാടുകൾ ഉണ്ടായത്.