ന്യൂഡൽഹി: അന്താരാഷ്ട്ര യോഗ ദിനത്തിൽ കേന്ദ്രസർക്കാരിനെ പ്രശംസിച്ച് കോൺഗ്രസ് നേതാവ് ശശി തരൂർ എംപി. യോഗയെ ജനകീയമാക്കിയതിനും ദേശീയ നയത്തിന്റെ ഭാഗമാക്കിയതിനും മുൻ പ്രധാനമന്ത്രി ജവഹർലാൽ നെഹ്രുവിന് നന്ദി പറഞ്ഞുകൊണ്ടുള്ള കോൺഗ്രസിന്റെ ട്വീറ്റ് പങ്കുവച്ചുകൊണ്ടാണ് തരൂർ തന്റെ അഭിപ്രായം പറഞ്ഞത്.
യോഗാദിനം അന്താരാഷ്ട്രവൽക്കരിക്കാൻ മോദി സർക്കാരും വിദേശകാര്യ മന്ത്രാലയവും നടത്തിയ ശ്രമങ്ങൾ നാം മനസ്സിൽ സൂക്ഷിക്കണമെന്ന് അദ്ദേഹം പറഞ്ഞു.തീർച്ചയായും! മോദി സർക്കാർ ഉൾപ്പെടെ യോഗയെ പുനരുജ്ജീവിപ്പിക്കുകയും ജനകീയമാക്കുകയും ചെയ്ത എല്ലാവരെയും അംഗീകരിക്കണം. ഞാൻ മുമ്പ് പറഞ്ഞത് പോലെ, നമ്മുടെ ശക്തിയുടെ ഒരു സുപ്രധാന ഭാഗമാണ് യോഗ, അത് അംഗീകരിക്കപ്പെട്ടതിൽ സന്തോഷമുണ്ടെന്നായിരുന്നു തരൂരിന്റെ ട്വീറ്റ്.
ഇതിന് മുൻപ് പുതിയ പാർലമെന്റ് മന്ദിരത്തിൽ ചെങ്കോൽ സ്ഥാപിച്ചതിൽ ശശിതരൂർ കോൺഗ്രസിന്റെ വാദങ്ങളെ തള്ളിയിരുന്നു. നമ്മുടെ വർത്തമാന കാല മൂല്യങ്ങൾ ഊട്ടി ഉറപ്പിക്കുന്നതിന്റെ ഭാഗമായി എല്ലാവരും ഈ ചിഹ്നം സ്വീകരിക്കണമെന്നായിരുന്നു പ്രധാനമന്ത്രി നരേന്ദ്രമോദി ചെങ്കോൽ സ്ഥാപിച്ചതിന് തൊട്ടുപിന്നാലെ ശശി തരൂർ ട്വീറ്റ് ചെയ്തത്. ഭരണഘടന ജനങ്ങളുടെ പേരിലാണ് അംഗീകരിക്കേണ്ടത് എന്ന കോൺഗ്രസ് ഉൾപ്പെടെയുള്ള പ്രതിപക്ഷത്തിന്റെ വാദവും അദ്ദേഹം അംഗീകരിച്ചിരുന്നു. ചെങ്കോൽ വിഷയത്തിൽ ഇരുപക്ഷത്തും ന്യായമുണ്ടെന്നായിരുന്നു ശശി തരൂരിന്റെ വാദം. ഇത് കെട്ടടങ്ങും മുൻപേയാണ് അദ്ദേഹത്തിന്റെ അടുത്ത ഭിന്നാഭിപ്രായം.
Discussion about this post