ഇംഫാൽ: മണിപ്പൂരിൽ പോലീസ് കമാൻഡോകളുടെ കറുത്ത യൂണിഫോം ധരിച്ച് കലാപകാരികൾ എത്താൻ സാധ്യതയുണ്ടെന്ന മുന്നറിയിപ്പുമായി പോലീസ്. കമാൻഡോ യൂണിഫോം ദുരുപയോഗം ചെയ്യരുതെന്നും പോലീസ് നിർദ്ദേശിച്ചു. പോലീസ് കമാൻഡോകളുടെ കറുത്ത യൂണിഫോം ധരിച്ച് ഒരു സംഘം അക്രമകാരികൾ നടന്നു നീങ്ങുന്നതിന്റെ വീഡിയോ കഴിഞ്ഞ ദിവസം പുറത്ത് വന്നിരുന്നു.
കലാപത്തിനിടെ പോലീസ് ക്യാമ്പുകളിൽ നിന്ന് മോഷ്ടിച്ച വസ്ത്രങ്ങളാണിതെന്ന് തിരിച്ചറിഞ്ഞിട്ടുണ്ട്. ഇതിന് പിന്നാലെയാണ് പോലീസ് ജാഗ്രതാ നിർദ്ദേശം പുറപ്പെടുവിച്ചിരിക്കുന്നത്. സൈനിക വാഹനങ്ങൾ അടക്കം പരിശോധിക്കാൻ പോലീസ് മേധാവി നിർദ്ദേശം നൽകിയിട്ടുണ്ട്. സംസ്ഥാനത്ത് കലാപം ആരംഭിച്ചതിന് പിന്നാലെ പോലീസ് സേനയും രണ്ടായി വിഘടിച്ചിരുന്നു.
മെയ്തെയ് വിഭാഗത്തിൽപ്പെടുന്ന ഉദ്യോഗസ്ഥർ ഇംഫാൽ താഴ്വാരങ്ങളിലേക്കും കുക്കി വിഭാഗത്തിൽപ്പെടുന്നവർ മലമുകളിലേക്കും മാറുകയായിരുന്നു. 1200 ഉദ്യോഗസ്ഥർ ജോലിയിൽ നിന്ന് വിട്ടുനിൽക്കുന്നുണ്ടെന്ന് ഡിജിപി രാജീവ് സിംഗ് പറഞ്ഞു. ഇവരെ തിരികെ ജോലിയിൽ പ്രവേശിപ്പിക്കാനുള്ള ശ്രമങ്ങൾ നടക്കുകയാണെന്നും അധികൃതർ പറയുന്നു.
Discussion about this post