യുഎഇ : ഒരു ദിവസത്തെ സന്ദർശനത്തിനായി യുഎഇയിലെത്തിയ ഇന്ത്യൻ പ്രധാനമന്ത്രിക്കായി യുഎഇ പ്രസിഡന്റ് ഒരുക്കിയ വിരുന്നിലെ മെനു ആണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. നരേന്ദ്ര മോദിയോടുള്ള ബഹുമാനാർത്ഥം സംഘടിപ്പിച്ച വിരുന്നിൽ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ സമ്പൂർണ സസ്യാഹാരമാണ് വിളമ്പിയത്. അറേബ്യൻ വിഭവമായ ഹരീസ്, ഈന്തപ്പഴ സാലഡ്, മസാല സോസിൽ ഗ്രിൽ ചെയ്ത പച്ചക്കറികൾ, കാരറ്റ് തന്തൂരി എന്നിവയാണ് മോദിയ്ക്കായുള്ള വിരുന്നിലെ മെനുവിൽ പ്രത്യേകം ഇടം നേടിയത്.
ശനിയാഴ്ച അബുദാബിയിലെ ഖസർ-അൽ-വതൻ പ്രസിഡൻഷ്യൽ കൊട്ടാരത്തിലായിരുന്നു നരേന്ദ്രമോദിക്കായി വിരുന്ന് ഒരുക്കിയിരുന്നത്. സലാഡുകളിൽ ഗോതമ്പ് കൊണ്ട് തയ്യാറാക്കുന്ന ഹരീസും ഈന്തപ്പഴ സലാഡും ഒപ്പം പ്രാദേശിക ജൈവ പച്ചക്കറികളും ഒരുക്കിയിരുന്നു. സ്റ്റാർട്ടർ ആയി മസാല സോസ് ചേർത്ത ചുട്ടെടുത്ത പച്ചക്കറികളും മെയിൻ കോഴ്സ് ആയി അറേബ്യൻ ഹരീസും കറുത്ത പയറും കോളിഫ്ലവറും ക്യാരറ്റ് തന്തൂരിയും ആയിരുന്നു. ഡെസർട്ട് ആയി പ്രാദേശിക പഴങ്ങൾ ആയിരുന്നു ഒരുക്കിയിരുന്നത്. എല്ലാ വിഭവങ്ങളും സസ്യ എണ്ണയിൽ ആണ് തയ്യാറാക്കിയിരിക്കുന്നത് എന്നും പാലോ മുട്ടയോ പോലുള്ള ഒന്നും തന്നെ ചേർത്തിട്ടില്ല എന്നും മെനുവിൽ പ്രത്യേകം രേഖപ്പെടുത്തിയിട്ടുണ്ട്.
രണ്ടുദിവസത്തെ ഫ്രാൻസ് പര്യടനത്തിനു ശേഷമാണ് യുഎഇ പ്രസിഡന്റിന്റെ പ്രത്യേക ക്ഷണപ്രകാരം ഒരു ദിവസത്തെ സന്ദർശനത്തിനായി പ്രധാനമന്ത്രി നരേന്ദ്രമോദി യുഎഇയിൽ എത്തിയത്. അബുദാബിയിലെ ഖസർ അൽ വത്താനിലെത്തിയ അദ്ദേഹത്തെ യു എ ഇ പ്രസിഡന്റ് മുഹമ്മദ് ബിൻ സായിദ് അൽ നഹ്യാൻ സ്വീകരിച്ചു.
Discussion about this post