ഹൈദരാബാദ് : അനുദീപ് ദുരിഷെട്ടി ഹൈദരാബാദ് ജില്ലാ കളക്ടർ ആയി ചുമതലയേറ്റു. സംസ്ഥാന സർക്കാരിന്റെ നിർദ്ദേശ പ്രകാരം ശനിയാഴ്ച്ചയാണ് ചുമതലയേറ്റത്. 2017 ലെ സിവിൽ സർവ്വീസ് പരീക്ഷയിൽ ഒന്നാം റാങ്ക് കരസ്ഥമാക്കിയ ഇദ്ദേഹം തന്നെയാണ് അധികാരത്തിലേറുന്ന ഏറ്റവും പ്രായം കുറഞ്ഞ ജില്ലാ കളക്ടറും. തന്റെ അഞ്ചാമത്തെ പരിശ്രമമാണ് സിവിൽ സർവ്വീസ് എന്ന സ്വപ്നത്തിലേക്കെത്തിച്ചത് എന്ന് അനുദീപ് പറഞ്ഞു.
ഭദ്രാദ്രി കോതഗുദെമിൽ അഡീഷണൽ കളക്ടറായിരുന്നു അനുദീപ്. അവിടെ നിന്നാണ് ഹൈദരാബാദിലേക്ക് കളക്ടറായി എത്തുന്നത്. റവന്യൂ സർവ്വീസ് അസിസ്റ്റന്റ് കമ്മീഷ്ണറായിരുന്നു. തന്റെ പരിശ്രമത്തിനു കരുത്ത് പകർന്ന് കൂടെ നിന്ന എല്ലാവരോടും അദ്ദേഹം നന്ദി രേഖപ്പെടുത്തി. വളർന്നു വരുന്ന യുവതലമുറയ്ക്ക് അനുദീപ് മാതൃകയും, പ്രചോദനവുമാണെന്ന് തെലുങ്കാന മുഖ്യമന്ത്രി കെ ചന്ദ്രശേഖർ റാവു പറഞ്ഞു.
നരവംശ ശാസ്ത്രം പ്രധാന വിഷയമാക്കി ആയിരുന്നു അനുദീപിന്റെ സിവിൽ സർവ്വീസ് പഠനം. ഏറെ പ്രക്ഷോഭത്താൽ രൂപം കൊണ്ട തന്റെ സംസ്ഥാനത്തെ സേവിക്കാൻ അവസരം ലഭിച്ചതിന്റെ സന്തോഷത്തിലാണ് അനുദീപ്. തെലുങ്കാനയിലെ ഗ്രാമ പ്രദേശമായ മെട്ട്പളളിയിലാണ് ജനനം. അച്ഛൻ ദുരിഷെട്ടി മനോഹർ വൈദ്യുത വകുപ്പ് അസിസ്റ്റന്റ് എഞ്ചിനീയറായി ജോലി ചെയ്യുകയാണ്. അമ്മ ജ്യോതി.
31 ഐഎഎസ് ഉദ്യോസ്ഥരെയാണ് സർക്കാർ സ്ഥലംമാറ്റിയത്. സിവിൽ സർവ്വീസിൽ കയറി അഞ്ച് വർഷത്തിനുളളിൽ കളക്ടറാകുന്ന ഒരാൾ ഹൈദരാബാദിൽ ചുമതലയേൽക്കുന്നതും ഒരു പക്ഷെ ആദ്യമായിരിക്കുമെന്ന് ഉദ്യോഗസ്ഥർ പറയുന്നു. സർക്കാരിന്റെ ക്ഷേമ പദ്ധതികൾ അർഹരായവരിൽ എത്തുന്നുവെന്ന് ഉറപ്പിക്കാൻ കഠിനമായി പരിശ്രമിക്കാനാണ് ചുമതലയേറ്റെടുത്തതിന് പിന്നാലെ അനുദീപ് കളക്ടറേറ്റിലെ ജീവനക്കാർക്ക് നൽകിയ ഉപദേശം.
