ന്യൂഡൽഹി : സ്വന്തമായി കോടികളുടെ സമ്പാദ്യവും രമ്യഹർമ്മ്യങ്ങളും ആഡംബര വാഹനങ്ങളുമുള്ള രാഷ്ട്രീയ നേതാക്കളും ജന പ്രതിനിധികളും ഇന്ത്യയിൽ സാധാരണമാണ്. എന്നാൽ ഒരു രൂപ പോലും ബാങ്ക് അക്കൗണ്ടിലില്ലാത്ത വീടും വാഹനവും ഇല്ലാത്ത ജനപ്രതിനിധികളും ഇന്ത്യയിലുണ്ട്. അത്തരത്തിലൊരു എം.എൽ.എയുടെ വിവരങ്ങളാണ് ഇപ്പോൾ പുറത്തുവന്നിരിക്കുന്നത്.
അസോസിയേഷൻ ഫോർ ഡെമോക്രാറ്റിക് റിഫോംസും (എഡിആർ) നാഷണൽ ഇലക്ഷൻ വാച്ചും (പുതിയ) അടുത്തിടെ നടത്തിയ പഠനത്തിന്റെ അടിസ്ഥാനത്തിൽ ആണ് വിവരങ്ങൾ പുറത്തു വന്നത്. ഇന്ത്യയിലെ സംസ്ഥാന അസംബ്ലികളിലെയും കേന്ദ്ര ഭരണ പ്രദേശങ്ങളിലെയും സിറ്റിംഗ് എംഎൽഎമാരുടെയും കഴിഞ്ഞ തെരഞ്ഞെടുപ്പിൽ മത്സരിക്കുന്നതിന് മുമ്പ് സമർപ്പിച്ച സത്യവാങ്മൂലത്തിന്റെ അടിസ്ഥാനത്തിൽ ആണ് പഠനം നടത്തിയത്. 28 സംസ്ഥാന അസംബ്ലികളിലും രണ്ട് കേന്ദ്ര ഭരണ പ്രദേശങ്ങളിലുമായി 4,033 എംഎൽഎമാരിൽ 4,001 പേരുടെ വിവരങ്ങളാണ് പഠനത്തിനായി ഉപയോഗിച്ചത്.
ഭാരതീയ ജനതാ പാർട്ടി എംഎൽഎയായ നിർമൽ കുമാർ ധാരയാണ് ഇന്ത്യയിലെ ഏറ്റവും ദരിദ്രനായ നിയമസഭാ സാമാജികനെന്ന് പഠനത്തിൽനിന്നും കണ്ടെത്തി. അദ്ദേഹത്തിന്റെ സത്യവാങ്മൂലത്തിൽ ആകെ ആസ്തി വെറും 1,700 രൂപയാണ്. 1982 മാർച്ച് 31 ന് ജനിച്ച ധാരയുടെ ബാങ്ക് അക്കൗണ്ടിൽ ഒരു രൂപ പോലും ഇല്ല, സ്വന്തമായി വീടോ വാഹനമോ ഇല്ല, പേരിൽ ഇൻഷുറൻസ് പോളിസിയും ഇല്ല. നിർമ്മൽ കുമാർ ധാരയുടെ സത്യവാങ്മൂലമനുസരിച്ച്, വ്യക്തിഗത വായ്പയും ആഭരണങ്ങളും ഇല്ല. കുഷ്മുരി ഗ്രാമത്തിലെ താമസക്കാരനായ ഇന്ത്യയിലെ ഏറ്റവും ദരിദ്രനായ നിയമനിർമ്മാതാവിന് സ്വന്തമായി ഭൂമിയോ വാണിജ്യ സ്ഥാപനമോ പാർപ്പിടമോ ഇല്ല.
കുട്ടികൾക്ക് ട്യൂഷൻ എടുത്താണ് അദ്ദേഹം ഉപജീവനം നടത്തിയിരുന്നത്. എം.എ ഇംഗ്ലീഷ് ബിരുദധാരിയാണ് നിർമൽ കുമാർ ധാര. പട്ടിക ജാതിക്കാർക്ക് സംവരണം ചെയ്തിരിക്കുന്ന ഇന്ദാസ് മണ്ഡലത്തിൽ നിന്നുള്ള എം.എൽ.എയാണ് ധാര. ഏഴായിരത്തിൽ പരം വോട്ടുകളുടെ ഭൂരിപക്ഷത്തിലാണ് അദ്ദേഹം വിജയിച്ചത്. ഭാര്യ അനുരാധ വീട്ടമ്മയാണ്. മകൾ അന്വേഷ.
Discussion about this post