മനുഷ്യരുടെ മാംസാഹാര രീതിയും ഹരിതഗൃഹ വാതക ഉദ്‌വമനവും തമ്മിൽ എന്താണ് ബന്ധം ? ഓക്സ്ഫോർഡ് സർവകലാശാലയുടെ പുതിയ പഠനം അമ്പരപ്പിക്കുന്നത്

മനുഷ്യരുടെ ഭക്ഷണരീതി ഭൂമിയുടെ നിലനിൽപ്പിനെ തന്നെ ബാധിക്കുന്നുണ്ട് എന്ന് നിങ്ങൾക്കറിയാമോ ? നമ്മൾ മനുഷ്യർ കഴിക്കുന്ന മാംസാഹാരത്തിന്റെ അളവിലെ ഉയർച്ചയും താഴ്ചയും ഭൂമിയിലെ ഹരിതഗൃഹ വാതക ഉദ്‌വമനത്തിന്റെ അളവിലും വ്യത്യാസം ഉണ്ടാക്കുന്നു എന്നാണ് പുതിയ പഠനങ്ങൾ കണ്ടെത്തിയിരിക്കുന്നത്. ഓക്സ്ഫോർഡ് സർവകലാശാലയുടെ പുതിയ പഠനം വെളിപ്പെടുത്തുന്നത് യുകെയിലെ മാത്രം ആളുകൾ കഴിക്കുന്ന മാംസത്തിന്റെ അളവ് കുറയ്ക്കുന്നത് വഴി 80 ലക്ഷം കാറുകൾ ഉണ്ടാക്കുന്ന മലിനീകരണത്തിന്റെ അത്രയും ഫലം ഇല്ലാതാക്കാൻ കഴിയും എന്നാണ്.

പുതിയ ഗവേഷണത്തിന് നേതൃത്വം നൽകിയ ഓക്‌സ്‌ഫോർഡ് യൂണിവേഴ്‌സിറ്റിയിലെ പ്രൊഫസർ പീറ്റർ സ്‌കാർബറോയുടെ അഭിപ്രായത്തിൽ യുകെയിലെ കൂടുതൽ മാംസാഹാരം കഴിക്കുന്ന ആളുകൾ എല്ലാവരും കഴിക്കുന്ന മാംസത്തിന്റെ അളവ് കുറച്ചാൽ ഭൂമിയിൽ അത് വലിയ മാറ്റമുണ്ടാക്കുമെന്നാണ്. ലൈവ്‌സ്റ്റോക്ക് എൻവയോൺമെന്റ് ആൻഡ് പീപ്പിൾ പദ്ധതിയുടെ ഭാഗമായ പ്രൊഫ. സ്കാർബറോ ഗവേഷണത്തിന്റെ ഭാഗമായി 55,000 ആളുകളിലാണ് സർവേ നടത്തിയത്. ഇവരിൽ ഒരു വിഭാഗം മാംസാഹാരം കൂടുതലായി കഴിക്കുന്നവരും മറ്റൊരു വിഭാഗം പരിമിതമായ അളവിൽ മാത്രം മാംസാഹാരം കഴിക്കുന്നവരും ആയിരുന്നു.

മാംസഹാരം പൂർണമായും ഒഴിവാക്കണമെന്നല്ല പകരം അതിന്റെ അളവ് പരിമിതപ്പെടുത്തണമെന്നാണ് പ്രൊഫ. സ്കാർബറോ പറയുന്നത്. കുറവ് മാംസം കഴിക്കുന്നവരെ അപേക്ഷിച്ച് കൂടുതൽ അളവിൽ മാംസം കഴിക്കുന്നവർ വലിയ രീതിയിലുള്ള കാർബൺ പുറന്തള്ളലിന് കാരണമാകുന്നുണ്ട്. കൂടാതെ മാംസാഹാരം ഉല്പാദിപ്പിക്കുന്നതിന് സസ്യാഹാരം ഉല്പാദിപ്പിക്കുന്നതിനേക്കാൾ വലിയ അളവിൽ പാരിസ്ഥിതിക പ്രത്യാഘാതങ്ങൾ ഉണ്ടാകുന്നുണ്ട്. ഭൂവിനിയോഗം, ജലവിനിയോഗം, ജലമലിനീകരണം, ആവാസ വ്യവസ്ഥയുടെ നഷ്ടം എന്നിങ്ങനെയുള്ള നിരവധി പ്രത്യാഘാതങ്ങൾ മാംസ ഉത്പാദനവുമായി ബന്ധപ്പെട്ട് ഭൂമിക്ക് ഉണ്ടാകുന്നുണ്ട് എന്നാണ് ഓക്സ്ഫോർഡ് യൂണിവേഴ്സിറ്റിയിലെ ഗവേഷകരുടെ കണ്ടെത്തൽ.

മാംസാഹാരം കൂടുതലായി കഴിക്കുന്നവർ പ്രതിദിനം ഉല്പാദിപ്പിക്കുന്ന ഹരിതഗൃഹ വാതകങ്ങൾ 10.2 കിലോഗ്രാം വരെയാണ്. പരിമിതമായ അളവിൽ മാത്രം മാംസം കഴിക്കുന്ന ആളുകൾ 5.3 കിലോഗ്രാം ഹരിതഗൃഹ വാതകങ്ങളാണ് ദിവസവും പുറന്തള്ളുന്നത്. സസ്യാഹാരികൾ ആണെങ്കിൽ ദിനംപ്രതി 2.4 കിലോഗ്രാം ഹരിതഗൃഹ വാതകങ്ങൾ പുറന്തള്ളുന്നു എന്നുമാണ് കണക്ക്.

ഉയർന്നുവരുന്ന മാംസ ഉപഭോഗം ഭൂമിയെയും അന്തരീക്ഷത്തെയും പ്രതികൂലമായി ബാധിക്കുന്നുവെന്ന് മുൻപും പഠനങ്ങൾ വ്യക്തമാക്കിയിട്ടുണ്ട്. 2021-ൽ നേച്ചർ ഫുഡിൽ പ്രസിദ്ധീകരിച്ച ഒരു പ്രത്യേക പഠനം പറയുന്നത് ആഗോള ഹരിതഗൃഹ വാതക ഉദ്‌വമനത്തിന്റെ മൂന്നിലൊന്നിന് കാരണം ഭക്ഷ്യ ഉൽപ്പാദനമാണെന്നാണ് . കൂടാതെ യുകെയുടെ കാർബൺ നെറ്റ് സീറോ ടാർഗെറ്റ് നേടുന്നതിന് 2032 ഓടെ മാംസ ഉപഭോഗം 30% കുറയ്ക്കണമെന്ന് ഡിപ്പാർട്ട്‌മെന്റ് ഫോർ ദി എൻവയോൺമെന്റ് ഫുഡ് ആൻഡ് റൂറൽ അഫയേഴ്‌സിന്റെ ഒരു സ്വതന്ത്ര അവലോകനവും മുൻപ് ആവശ്യപ്പെട്ടിരുന്നു. ഇപ്പോൾ പുറത്തുവന്നിരിക്കുന്ന ഓക്സ്ഫോർഡ് സർവകലാശാലയുടെ ഗവേഷണ ഫലവും ഇതേ അഭിപ്രായം തന്നെയാണ് ആവർത്തിക്കുന്നത്.