നിലപാടുകൾ തുറന്നുപറയാൻ മടിയില്ലാത്ത നടിയാണ് ശ്രുതി ഹാസൻ. ആർത്തവ സമയത്തുണ്ടാകുന്ന കടുത്ത വേദനയെക്കുറിച്ചും, തൊഴിലിടങ്ങളിൽ സ്ത്രീകൾ നേരിടുന്ന പ്രയാസങ്ങളെക്കുറിച്ചും താരം പങ്കുവെച്ച വാക്കുകളാണ് ഇപ്പോൾ സോഷ്യൽ മീഡിയയിൽ വലിയ ചർച്ചയാകുന്നത്. പ്രശസ്ത നടി സോഹ അലി ഖാന്റെ പോഡ്കാസ്റ്റിൽ അതിഥിയായി എത്തിയപ്പോഴാണ് ശ്രുതി തന്റെ അനുഭവങ്ങളും ചിന്തകളും തുറന്നുപറഞ്ഞത്.
ആർത്തവത്തെക്കുറിച്ചുള്ള തെറ്റിദ്ധാരണകളെക്കുറിച്ചും സമൂഹം അതിന് വേണ്ടത്ര പ്രാധാന്യം നൽകാത്തതിനെക്കുറിച്ചും സംസാരിക്കവെയാണ് താരം കൗതുകകരമായ ഈ വിഷയം ഉന്നയിച്ചത്. “ഇതിനൊരു പരിഹാരമേയുള്ളൂ, പുരുഷന്മാർക്കും ആർത്തവമുണ്ടാകണമെന്ന് ഞാൻ ആയിരം തവണ പ്രാർത്ഥിച്ചിട്ടുണ്ട്. അങ്ങനെയായിരുന്നെങ്കിൽ നമ്മുടെ തൊഴിൽ കരാറുകളിൽ ‘പീരിയഡ് ഹോളിഡേ’ (Period Holiday) ഉൾപ്പെടുത്താമായിരുന്നു,” എന്ന് ശ്രുതി ചിരിയോടെ പറഞ്ഞു. തനിക്ക് പിസിഒഎസ് (PCOS) ഉള്ളതിനാൽ ആർത്തവ സമയത്ത് കടുത്ത വേദന അനുഭവപ്പെടാറുണ്ടെന്നും, സിനിമാ സെറ്റുകളിൽ സഹപ്രവർത്തകന്റെ ശസ്ത്രക്രിയയെ മനസ്സിലാക്കുന്ന അത്ര പോലും ആർത്തവ വേദനയെ ഗൗരവമായി കാണാറില്ലെന്നും ശ്രുതി കൂട്ടിച്ചേർത്തു.
ശ്രുതിയുടെ ഈ അഭിപ്രായത്തെ സോഹ അലി ഖാനും പിന്തുണച്ചു. പുരുഷന്മാർക്കും ആർത്തവം ഉണ്ടായിരുന്നുവെങ്കിൽ അവർ ആർത്തവസമയത്തെ രക്തസ്രാവത്തിന്റെ അളവിനെക്കുറിച്ചും ഉപയോഗിക്കുന്ന ടാംപോണുകളുടെ വലുപ്പത്തെക്കുറിച്ചും പരസ്പരം മത്സരിക്കുമായിരുന്നു എന്ന് സോഹ തമാശരൂപേണ കൂട്ടിച്ചേർത്തു. നിലവിൽ സോഷ്യൽ മീഡിയയിൽ വൈറലായിക്കൊണ്ടിരിക്കുകയാണ് താരങ്ങളുടെ ഈ തുറന്നുപറച്ചിൽ.
