മുംബൈ: പൂനെയിലെ പ്രശസ്ത ഗണപതി ക്ഷേത്രത്തിൽ ദർശനം നടത്തി പ്രധാനമന്ത്രി നരേന്ദ്ര മോദി. ബുദ്ധവാർ പേടിലുള്ള ശ്രീമന്ത് ദഗദുഷേത് ഹൽവായി മന്ദിറിൽ ആയിരുന്നു അദ്ദേഹം എത്തിയത്. ക്ഷേത്രത്തിൽ ദർശനം നടത്തി വിവിധ പൂജകളിൽ പങ്കെടുക്കുന്ന അദ്ദേഹത്തിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
രാവിലെയോടെയായിരുന്നു അദ്ദേഹത്തിന്റെ ക്ഷേത്ര ദർശനം. ലോകമാന്യതിലക് പുരസ്കാരം ഏറ്റുവാങ്ങുന്നതിന് വേണ്ടിയായിരുന്നു അദ്ദേഹം മഹാരാഷ്ട്രയിൽ എത്തിയത്. ചടങ്ങിൽ പങ്കെടുക്കുന്നതിന് മുന്നോടിയായി അദ്ദേഹം ക്ഷേത്രത്തിൽ എത്തുകയായിരുന്നു. പ്രാർത്ഥിച്ച ശേഷം അദ്ദേഹം വിശേഷാൽ പൂജകളിൽ പങ്കെടുത്തു. ശ്രീകോവിലിന് മുൻപിൽ ഇരുന്ന് പൂജ നടത്തുന്ന പ്രധാനമന്ത്രിയുടെ വീഡിയോയും ചിത്രങ്ങളുമാണ് വ്യാപകമായി പ്രചരിക്കുന്നത്.
മഹാരാഷ്ട്രയിൽ എത്തിയ നരേന്ദ്ര മോദിയെ മുഖ്യമന്ത്രി ഏകനാഥ് ഷിൻഡെ, ഉപമുഖ്യമന്ത്രിമാരായ ദേവേന്ദ്ര ഫട്നാവിസ്, അജിത് പവാർ എന്നിവർ ചേർന്ന് സ്വീകരിച്ചു. പുരസ്കാരം ഏറ്റുവാങ്ങുന്നതിന് പുറമേ മറ്റ് പരിപാടികളിലും പങ്കെടുക്കുന്നതിന് വേണ്ടിയാണ് പ്രധാനമന്ത്രി മഹാരാഷ്ട്രയിൽ എത്തിയത്. പുരസ്കാരം ഏറ്റുവാങ്ങിയ ശേഷം പ്രധാനമന്ത്രി സംസ്ഥാനത്തെ വിവിധ വികസന പദ്ധതികൾക്ക് തുടക്കം കുറിയ്ക്കും. പൂർത്തിയായ പദ്ധതികൾ അദ്ദേഹം ഉദ്ഘാടനം ചെയ്യും.
Discussion about this post