ഗാന്ധിനഗര് : തദ്ദേശ സ്വയം ഭരണ സ്ഥാപനങ്ങളിലേക്കുള്ള ഉപതെരഞ്ഞെടുപ്പില് വന് മുന്നേറ്റം തുടര്ന്ന് ബിജെപി. തെരഞ്ഞെടുപ്പ് നടന്ന 30 സീറ്റുകളില് 21 എണ്ണവും സ്വന്തമാക്കിയാണ് ബിജെപി വീണ്ടും തിളങ്ങിയത്. 9 സീറ്റുകളില് മാത്രമാണ് കോണ്ഗ്രസിന് ജയിക്കാനായത്. ഗുജറാത്തിലെ 29 മുന്സിപ്പാലിറ്റികളിലും ഒരു സിറ്റി കോര്പ്പറേഷനിലുമാണ് ഉപ തെരഞ്ഞെടുപ്പ് നടന്നത്.
സൂറത്ത് മുനിസിപ്പല് കോര്പ്പറേഷന്റെ വാര്ഡ് നമ്പര് 20ലേക്ക് നടന്ന ഉപതെരഞ്ഞെടുപ്പില് ബിജെപിയുടെ രാജേഷ്ഭായ് റാണ വിജയിച്ചു.
‘ഗുജറാത്തിലെ ജനങ്ങള് പാര്ട്ടിയുടെ നേതൃത്വത്തിലും കാഴ്ചപ്പാടിലുമുള്ള തങ്ങളുടെ അചഞ്ചലമായ വിശ്വാസം ഒരിക്കല് കൂടി തെളിയിച്ചു. പ്രധാനമന്ത്രി നരേന്ദ്രമോദിയും പാര്ട്ടി സംസ്ഥാന അധ്യക്ഷന് സിആര് പാട്ടീലിന്റെ ചടുലമായ നേതൃത്വവും നല്കിയ മാര്ഗനിര്ദേശമാണ് ഈ തുടര്ച്ചയായ പിന്തുണക്ക് കാരണം’, ബിജെപി സംസ്ഥാന ജനറല് സെക്രട്ടറി രജനി പട്ടേല് പറഞ്ഞു. മുഖ്യമന്ത്രി ഭൂപേന്ദ്ര പട്ടേലിന്റെ ഭരണത്തിന് കീഴില് സംസ്ഥാനം ദ്രുതഗതിയിലുള്ള വികസനത്തിനും വളര്ച്ചയ്ക്കുമാണ് സാക്ഷ്യം വഹിക്കുന്നത്. ഇത് ഗുജറാത്തില് ബിജെപിയെ പുതിയ ഉയരങ്ങളിലേക്ക് എത്തിക്കുന്നുവെന്നും അദ്ദേഹം കൂട്ടിച്ചേര്ത്തു.
അതേസമയം, കോണ്ഗ്രസിന് മൂന്ന് സീറ്റുകളില് കെട്ടിവെച്ച തുക നഷ്ടമായപ്പോള്, സൂറത്ത്, രാജ്പിപ്ല, ഗോധ്ര, പോര്ബന്തര്, ധംഗധ്ര എന്നിവയുള്പ്പെടെ അഞ്ചിടത്ത് ആം ആദ്മി പാര്ട്ടിക്കും ഇതേ ഫലമാണ് നേരിടേണ്ടി വന്നത്.
