കഴിഞ്ഞ വർഷം ജൂണിൽ അന്താരാഷ്ട്ര അരങ്ങേറ്റം നടത്തിയ മെഴ്സിഡസ് ബെൻസിന്റെ രണ്ടാം തലമുറ ജിഎൽസി എസ് യു വി ഇന്ത്യൻ വിപണിയിലും പുറത്തിറക്കി. രണ്ട് പവർട്രെയിൻ ഓപ്ഷനുകൾ ലഭിക്കുന്നു എന്നുള്ളതാണ് ബെൻസിന്റെ രണ്ടാം തലമുറ ജിഎൽസി യുടെ സവിശേഷത. 73.5 ലക്ഷം രൂപയാണ് ഈ വാഹനത്തിന് ഇന്ത്യയിൽ എക്സ്-ഷോറൂം വിലയായി നിശ്ചയിച്ചിരിക്കുന്നത്.
വാഹനം ഇന്ത്യൻ വിപണിയിൽ പുറത്തിറക്കുന്നതിന് മുൻപായി കഴിഞ്ഞ ജൂലൈ 17 ന് ബുക്കിംഗ് ആരംഭിച്ചിരുന്നു. ഒന്നരലക്ഷം രൂപയായിരുന്നു ബുക്കിംഗ് തുക. ഇതുവരെ 1500 ലധികം ബുക്കിംഗുകൾ ലഭിച്ചതായി മെഴ്സിഡസ് ബെൻസ് ഇന്ത്യ അറിയിക്കുന്നു. രണ്ടാം തലമുറ ജിഎൽസിയിൽ ത്രീ-പോയിന്റഡ് സ്റ്റാർ ലോഗോയുള്ള വലിയ ഗ്രില്ലിൽ പുനർരൂപകൽപ്പന ചെയ്ത എൽഇഡി ഹെഡ്ലൈറ്റുകൾ ബന്ധിപ്പിച്ചിട്ടുണ്ട്. 19 ഇഞ്ച് അലോയ് വീലുകളും മുൻ മോഡലിൽ ഉണ്ടായിരുന്ന രണ്ടിന് പകരം ഒരൊറ്റ തിരശ്ചീന സ്ലാറ്റും ആണ് പുതിയ ജിഎൽസിയുടെ ഡിസൈനിൽ കൊണ്ടുവന്നിരിക്കുന്ന പുതുമകൾ.
പ്രധാനമായും രണ്ടു മോഡലുകളിൽ ആണ് വാഹനം അവതരിപ്പിക്കപ്പെടുന്നത്. പെട്രോൾ, ഡീസൽ വകഭേദങ്ങളായ GLC 300 , GLC 220d എന്നിവയാണിത്.
ജിഎൽസി 300-ന് 258hp യും 400Nm torque ഉം ഉത്പാദിപ്പിക്കുന്ന 2.0-ലിറ്റർ ടർബോ-പെട്രോൾ എഞ്ചിനാണ് കരുത്ത് പകരുന്നത്. ജിഎൽസി 220d-ന് 197hp പവറും 440Nm torque ഉം ഉത്പാദിപ്പിക്കുന്ന 2.0 ലിറ്റർ ഡീസൽ എഞ്ചിൻ കരുത്തേകുന്നു. രണ്ട് വകഭേദങ്ങളിലും 48V മൈൽഡ്-ഹൈബ്രിഡ് സിസ്റ്റം ലഭിക്കുന്നതാണ്.
Discussion about this post