ന്യൂഡല്ഹി : ഡല്ഹി ഓര്ഡിനന്സിന് പകരമായി കേന്ദ്ര സര്ക്കാര് കൊണ്ടുവന്ന ഡല്ഹി സര്വ്വീസ് ആക്ട് രാഷ്ട്രപതി ദ്രൗപദി മുര്മ്മു ഒപ്പുവച്ചതോടെ നിയമമായി മാറി. ഇരു സഭകളും പാസാക്കിയ ബില്ലിന് ഇന്നാണ് രാഷ്ട്രപതി അംഗീകാരം നല്കിയത്. രാജ്യ തലസ്ഥാനത്ത് അഴിമതിരഹിത ഭരണം ഉറപ്പാക്കുകയാണ് ഇതിലൂടെ കേന്ദ്ര സര്ക്കാര് ലക്ഷ്യമിടുന്നത്.
ഡല്ഹിക്ക് സംസ്ഥാനത്തിന്റെ പദവി നല്കിയിട്ടുണ്ടെങ്കിലും ആഭ്യന്തരമടക്കമുള്ള സുപ്രധാന വകുപ്പുകളൊക്കെ കേന്ദ്രത്തിന്റെ കീഴിലാണ്. എന്നാല് ഇത്തരം അധികാരങ്ങള് സംസ്ഥാന സര്ക്കാരിനെ അനുവദിക്കണമന്ന് ആവശ്യപ്പെട്ടുള്ള ഹര്ജി സുപ്രീം കോടതി ശരിവച്ചിരുന്നു. എന്നാലിത് പ്രായോഗികമല്ലെന്നും ദേശീയ തലസ്ഥാനത്തിന്റെ ആഭ്യന്തരം പോലെയുള്ള വിഷയങ്ങള് കേന്ദ്രത്തിന് കീഴില് തന്നെ തുടരണമെന്നും കേന്ദ്രം ആവശ്യപ്പെട്ടിരുന്നു. ഇതേ തുടര്ന്നാണ് കേന്ദ്ര സര്ക്കാര് ഡല്ഹി സര്വ്വീസ് ആക്ട് കൊണ്ടുവന്നത്.
പാര്ലമെന്റിന്റെ വര്ഷകാല സമ്മേളനത്തില് പാസാക്കിയ ഡിജിറ്റല് പേഴ്സണല് ഡാറ്റ പ്രൊട്ടക്ഷന് ബില്, ജനന മരണ രജിസ്ട്രേഷന് ഭേദഗതി ബില്, ജന് വിശ്വാസ് ഭേദഗതി ബില് തുടങ്ങിയ ബില്ലുകള്ക്കും രാഷ്ട്രപതി അംഗീകാരം നല്കി.
