ആഗോളതലത്തിൽ യുദ്ധങ്ങളും രാഷ്ട്രീയ അസ്ഥിരതകളും വിതരണ ശൃംഖലകളെ തകിടം മറിക്കുമ്പോഴും ആഭ്യന്തര നിർമ്മാണ മേഖലയിലും തൊഴിലവസരങ്ങൾ സൃഷ്ടിക്കുന്നതിലും വൻ വളർച്ച കൈവരിച്ച് ഇന്ത്യ. ‘വികസിത് ഭാരത്’ എന്ന ലക്ഷ്യം സാക്ഷാത്കരിക്കുന്നതിനായി ഇറക്കുമതി ആശ്രയത്വം കുറച്ചുകൊണ്ട് ആഭ്യന്തര ഉൽപ്പാദനം വർദ്ധിപ്പിക്കുന്നതിനൊപ്പം ആഗോള വിതരണ ശൃംഖലകളിൽ രാജ്യത്തിന്റെ പങ്കാളിത്തം ഉറപ്പുവരുത്തുന്ന ആറ് നിർണ്ണായക മാർഗ്ഗങ്ങളിലൂടെയാണ് ഇന്ത്യ സ്വയംപര്യാപ്തതയിലേക്ക് മുന്നേറുന്നത്. രാജ്യം അതിവേഗം ഒരു വികസിത സമ്പദ്വ്യവസ്ഥയായി മാറുന്നതിന്റെ ഭാഗമായി നിരവധി അടിസ്ഥാനസൗകര്യ വികസന പദ്ധതികളും നൈപുണ്യ വികസന പരിപാടികളുമാണ് കേന്ദ്ര സർക്കാർ നടപ്പിലാക്കിവരുന്നത്.
ഇലക്ട്രോണിക്സ്, മൊബൈൽ നിർമ്മാണ മേഖലകളിലാണ് ഇന്ത്യ ഏറ്റവും വലിയ കുതിച്ചുചാട്ടം നടത്തിയത്. ലോകത്തിലെ പ്രമുഖ ആഗോള സാങ്കേതിക കമ്പനികൾ നിർമ്മാണ ശൃംഖലകൾ ഇന്ത്യയിലേക്ക് മാറ്റുകയും തദ്ദേശീയ കമ്പനികൾ ഉൽപ്പാദനം വൻതോതിൽ വർദ്ധിപ്പിക്കുകയും ചെയ്തു. ഇലക്ട്രോണിക് ഘടകങ്ങൾ നിർമ്മിക്കുന്ന പ്രാദേശിക വിതരണ ശൃംഖലയെ ശക്തിപ്പെടുത്തുന്നതിൽ നിർണ്ണായകമായത് സർക്കാർ ആവിഷ്കരിച്ച പ്രൊഡക്ഷൻ ലിങ്ക്ഡ് ഇൻസെന്റീവ് (PLI) പദ്ധതിയാണ്. പരമ്പരാഗത രീതിയിലുള്ള സബ്സിഡികൾക്ക് പകരം കമ്പനികളുടെ ഉൽപ്പാദന മികവിനും പ്രകടനത്തിനും അനുസരിച്ച് നേരിട്ട് ആനുകൂല്യങ്ങൾ നൽകുന്ന ഈ പദ്ധതി നിർമ്മാണ രംഗത്ത് വിപ്ലവകരമായ മാറ്റങ്ങൾക്കാണ് വഴിവെച്ചത്.
സെമികണ്ടക്ടർ നിർമ്മാണം, ഔഷധ മേഖല, പ്രതിരോധ ഉപകരണ ഉൽപ്പാദനം, പുനരുപയോഗ ഊർജ്ജം, ഹെവി എഞ്ചിനീയറിംഗ് തുടങ്ങിയ മേഖലകളിലും ഇന്ത്യ തദ്ദേശീയ ഉൽപ്പാദനം ശക്തമാക്കിയിട്ടുണ്ട്. ഇറക്കുമതി കുറയ്ക്കാൻ സാധിച്ചതിലൂടെ വിദേശനാണ്യ കരുതൽ ശേഖരം ഉയർത്താനും ലക്ഷക്കണക്കിന് പുതിയ തൊഴിലവസരങ്ങൾ സൃഷ്ടിക്കാനും രാജ്യത്തിന് സാധിച്ചു. ലോകരാജ്യങ്ങൾ സാമ്പത്തിക മാന്ദ്യത്തെയും യുദ്ധക്കെടുതികളെയും ഭയക്കുമ്പോൾ, ആഭ്യന്തര ഉൽപ്പാദന മികവിലൂടെയും സാങ്കേതിക വിദ്യയിലൂടെയും ഇന്ത്യ ലോകത്തിന്റെ പ്രധാന നിർമ്മാണ ഹബ്ബായി മാറുന്ന കാഴ്ചയ്ക്കാണ് ആഗോള സമൂഹം സാക്ഷ്യം വഹിക്കുന്നത്.
