കോട്ടയം: പുതുപ്പള്ളി മണ്ഡലത്തിലെ ജനങ്ങള്ക്ക് ലഭിച്ച കേന്ദ്ര സര്ക്കാര് ആനുകൂല്യങ്ങള് എടുത്ത് കാട്ടി ബിജെപി സംസ്ഥാന അധ്യക്ഷന് കെ സുരേന്ദ്രന്. അരി മുതല് വാക്സിന് വരെ എല്ലാം ജനങ്ങള്ക്ക് സൗജന്യമായി നല്കിയത് മോദി സര്ക്കാരാണെന്ന് അദ്ദേഹം പറഞ്ഞു. ഉപതിരഞ്ഞെടുപ്പിനോട് അനുബന്ധിച്ച് ബിജെപി സ്ഥാനാര്ഥി ജി ലിജിന് ലാലിനായി പ്രചരണത്തിനിറങ്ങിയതാണ് കെ സുരേന്ദ്രന്.
‘മോദി സര്ക്കാരിന്റേത് മാത്രമായി നിരവധി വികസന പ്രവര്ത്തനങ്ങളാണ് പുതുപ്പള്ളി മണ്ഡലത്തിലെ ജനങ്ങള്ക്ക് ലഭിച്ചിട്ടുള്ളത്. എല്ലാ വീടുകളിലും സൗജന്യമായി അരിയും കോവിഡ് വാക്സിനും നല്കി. എല്ലാ വീടുകളിലും വൈദ്യുതിയും വെള്ളവും എത്തിക്കുന്നു. പതിനായിരക്കണക്കിന് ആളുകള്ക്ക് മുദ്രാ വായ്പ ലഭിച്ചു. കൂടാതെ പ്രധാനമന്ത്രി ആവാസ് യോജന വഴി നിരവധി വീടുകളും കേന്ദ്ര സര്ക്കാര് നല്കിയിട്ടുണ്ട്’, സുരേന്ദ്രന് പറഞ്ഞു.
ലിജിന് ലാലിന്റെ സ്ഥാനാര്ഥിത്വം പ്രഖ്യാപിക്കാന് രണ്ട് ദിവസം വൈകിയെങ്കിലും പ്രചരണത്തില് ബിജെപി ഒട്ടു പിറകിലല്ലെന്ന് അദ്ദേഹം ചൂണ്ടിക്കാട്ടി. മോദി സര്ക്കാര് ജനങ്ങള്ക്ക് നല്കിയ ആനുകൂല്യങ്ങള് എടുത്ത് പറഞ്ഞ സുരേന്ദ്രന് കേരളത്തിലെ ഇടത് വലത് മുന്നണികള് അഴിമതിയില് മുങ്ങി പ്രതിക്കൂട്ടിലാണെന്നും കൂട്ടിച്ചേര്ത്തു.
കേരളത്തിലെ ജനങ്ങളെ നേരിട്ട ബാധിക്കുന്ന പ്രസക്തമായ വിഷയങ്ങളാണ് ബിജെപി സംസാരിക്കുന്നത്. വിലക്കയറ്റം, സപ്ലൈക്കോയില് സാധനങ്ങള് ലഭ്യമല്ലാത്തത്, വികസന പ്രതിസന്ധി തുടങ്ങിയ വിഷയങ്ങളാണ് ബിജെപി ജനങ്ങള്ക്ക് മുന്നില് വയ്ക്കുന്നത്. എന്നാല് മറ്റ് രണ്ട് മുന്നണികളും വോട്ട് ബാങ്ക് രാഷ്ട്രീയമാണ് പയറ്റുന്നത്. മിത്ത് വിവാദത്തില് ഇടതു പക്ഷം നിലപാട് മയപ്പെടുത്തിയാല് മാത്രം പോരാ. ഗണപതി നിന്ദയില് മാപ്പ് പറയുക തന്നെ വേണമെന്നും സുരേന്ദ്രന് വ്യക്തമാക്കി.
Discussion about this post