ന്യൂഡൽഹി: വിക്രം ലാൻഡറിൽ നിന്നും പ്രഗ്യാൻ റോവർ ചന്ദ്രനിൽ ഇറങ്ങിയതിന് പിന്നാലെ ഐഎസ്ആർഒയ്ക്ക് വീണ്ടും അഭിനന്ദനങ്ങൾ അറിയിച്ച് രാഷ്ട്രപതി ദ്രൗപദി മുർമു. റോവറിൽ നിന്നുള്ള വിവരങ്ങൾ ചന്ദ്രനെക്കുറിച്ചുള്ള നമ്മുടെ അറിവ് വർദ്ധിപ്പിക്കുമെന്ന് രാഷ്ട്രപതി പറഞ്ഞു. ട്വിറ്ററിലൂടെയായിരുന്നു മുർമുവിന്റെ പ്രതികരണം.
ഐഎസ്ആർഒയിലെ ഗവേഷക സംഘത്തിന് ഒരിക്കൽ കൂടി നന്ദി പറയുന്നു. വിക്രം ലാൻഡറിൽ നിന്നും പ്രഗ്യാൻ റോവർ വിജയകരമായി ചന്ദ്രനിൽ ഇറങ്ങിയിരിക്കുന്നു. വിക്രം ലാൻഡർ ചന്ദ്രോപരിതലത്തിൽ ഇറങ്ങി മണിക്കൂറുകൾക്കുള്ളിലായിരുന്നു മറ്റൊരു ഘട്ടം കൂടി വിജയിച്ചത്. ചന്ദ്രനെക്കുറിച്ചുള്ള നമ്മുടെ അറിവ് റോവറിൽ നിന്നുള്ള വിവരങ്ങൾ കൂടുതൽ സമ്പന്നമാക്കും. ഇതിനായി ഗവേഷകർക്കും രാജ്യത്തെ പൗരന്മാർക്കുമൊപ്പം ആകാംഷയോടെ കാത്തിരിക്കുന്നുവെന്നും രാഷ്ട്രപതി ട്വിറ്ററിൽ കുറിച്ചു.
അർദ്ധരാത്രിയോടെയായിരുന്നു ലാൻഡറിൽ നിന്നും റോവർ വിജയകരമായി ചന്ദ്രോപരിതലത്തിൽ ഇറങ്ങിയത്. ലാൻഡർ ഇറങ്ങി മണിക്കൂറുകൾക്ക് ശേഷമായിരുന്നു റോവറിന്റെ വിക്ഷേപണം സാദ്ധ്യമായത്. ലാൻഡർ ഇറങ്ങിയതിനെ തുടർന്ന് പൊടിപടലങ്ങൾ ഉയർന്നതിനാൽ പെട്ടെന്ന് റോവർ വിക്ഷേപിക്കുക പ്രയാസകമായിരുന്നു. മണിക്കൂറുകൾ കാത്തിരുന്ന ശേഷമായിരുന്നു റോവറിനെ ലാൻഡറിൽ നിന്നും പുറത്തിറക്കിയത്.
Discussion about this post