ന്യൂഡല്ഹി : പ്രകടന പത്രികയിലെ ഓരോ വാഗ്ദാനങ്ങളും പാലിച്ച് അതിവേഗം ബഹുദൂരം മൂന്നോട്ട് പോകുകയാണ് മോദി സര്ക്കാര്. ‘ഒരു രാജ്യം ഒരു തിരഞ്ഞെടുപ്പ’് ഉടന് നടപ്പാക്കാനായി കേന്ദ്രസര്ക്കാര് നിര്ണായക നീക്കവുമായാണ് രംഗത്ത് എത്തിയിരിക്കുകയാണ്. ഇതിന്റെ ഭാഗമായി പദ്ധതിയെക്കുറിച്ച് കൂടുതല് പഠിക്കുന്നതിനായി മുന് രാഷ്ട്രപതി രാംനാഥ് കോവിന്ദ് അദ്ധ്യക്ഷനായ സമിതിയെ നിയമിച്ചു. നിയമ വിദഗ്ധരും മുന്തിരഞ്ഞെടുപ്പ് കമ്മീഷണറും ഉള്പ്പെടെയുള്ളവരാകും മറ്റ് സമിതി അംഗങ്ങള്. വിഷയം പഠിച്ചതിന് ശേഷം പാനല് കേന്ദ്രത്തിന് റിപ്പോര്ട്ട് നല്കും. ഇതു സംബന്ധിച്ച് നിയമമന്ത്രാലയം ഉടന് വിജ്ഞാപനം ഇറക്കുമെന്നാണ് സൂചന.
രാജ്യത്തുടനീളം ഒരേസമയം തിരഞ്ഞെടുപ്പ് നടത്തുന്നതിന്റെ സാധ്യതകള് പരിശോധിക്കുന്നതിനാണ് സമിതിക്ക് രൂപം നല്കിയിരിക്കുന്നത്. സെപ്തംബര് 18 മുതല് 22 വരെ നടക്കാനിരിക്കുന്ന പ്രത്യേക പാര്ലമെന്റ് സമ്മേളനത്തില് ‘ഒരു രാജ്യം, ഒരു തിരഞ്ഞെടുപ്പ്’ സംബന്ധിച്ച് നിയമനിര്മാണം നടന്നേക്കുമെന്ന വാര്ത്തകള്ക്ക് പിന്നാലെയാണ് ഇപ്പോള് കേന്ദ്രത്തിന്റെ നിര്ണായക നീക്കം. സമ്മേളനം ഫലപ്രദമായ ചര്ച്ചകള്ക്കായാണെന്ന് കേന്ദ്രമന്ത്രി പ്രള്ഹാദ് ജോഷി നേരത്തെ അറിയിച്ചിരുന്നു. രാജ്യം അമൃത്കാലത്തേക്ക് കടക്കുന്ന സമയത്ത് ഇന്ത്യയുടെ വികസനത്തിന് വേണ്ടിയുള്ള ചര്ച്ചകള് സമ്മേള്ളനത്തില് ഉണ്ടാകും എന്ന സൂചനയാണ് സര്ക്കാര് നല്കുന്നത്. എന്നാല് എന്ത് തരത്തിലുള്ള ചര്ച്ചകളാണ് ഈ സമ്മേളനത്തില് ഉണ്ടാകുക എന്ന് മന്ത്രി വ്യക്തമാക്കിയിരുന്നില്ല.
ഒരു രാജ്യം ഒരു തിരഞ്ഞെടുപ്പ് നടപ്പാക്കുന്നതിനായി ഭരണഘടനാ ഭേദഗതി ഉള്പ്പെടെയുള്ളവ ആവശ്യമുണ്ട്. അതിനുപുറമെ വിപുലമായ സാങ്കേതികവും വിഭവപരവുമായ സൗകര്യങ്ങളും തയ്യാറാക്കേണ്ടതുണ്ട്. തിരഞ്ഞെടുപ്പ് യന്ത്രങ്ങള് ഒരുക്കേണ്ടതും സര്ക്കാരുകളുടെ കാലാവധി ഒരുമിച്ചാക്കുന്നത് സംബന്ധിച്ചുമെല്ലാം ചര്ച്ചകള് ഉയര്ന്നപ്പോള് തന്നെ പദ്ധതിക്ക് വലിയതോതിലുള്ള തയ്യാറെടുപ്പുകള് വേണ്ടിവരുമെന്ന് തിരഞ്ഞെടുപ്പ് കമ്മിഷന് നേരത്തെ വ്യക്തമാക്കിയിരുന്നു. നിയമമന്ത്രാലയം വിജ്ഞാപനം പുറത്തിറക്കുമ്പോള് മാത്രമേ എതെല്ലാം മേഖലകളിലാണ് പഠനം നടക്കുന്നതെന്നു വ്യക്തമാകുകയുള്ളു.
ലോക്സഭയിലേക്കും സംസ്ഥാന നിയമസഭകളിലേയ്ക്കും ഒറ്റ തിരഞ്ഞെടുപ്പ് എന്ന ആശയം ഏറെക്കാലമായി ബി.ജെ.പി. മുന്നോട്ടുവയ്ക്കുന്നുണ്ട്. എന്നാല് ഇതിനെതിരേ പ്രതിപക്ഷ കക്ഷികള്ക്കിടയില്നിന്നടക്കം എതിര്പ്പ് ഉയര്ന്നിരുന്നു. ഒറ്റ തിരഞ്ഞെടുപ്പു നടത്തുന്നത് പൊതുഖജനാവിന് വലിയ ലാഭമുണ്ടാക്കുമെന്നും വികസന പദ്ധതികള്ക്കുണ്ടാകുന്ന തടസ്സം ഒഴിവാകുമെന്നുമാണ് കേന്ദ്രസര്ക്കാര് ചൂണ്ടിക്കാട്ടുന്നത്. ഒറ്റ തിരഞ്ഞെടുപ്പ് നടത്തുന്നതിലെ സാധ്യതകള് തിരഞ്ഞെടുപ്പ് കമ്മിഷനുള്പ്പെടെയുള്ളവരുമായി ചേര്ന്ന് പാര്ലമെന്റ് പാനല് നേരത്തെ പരിശോധിച്ചിരുന്നു.
