ന്യൂഡൽഹി: ജി20 ഉച്ചകോടിക്ക് ഇന്ന് ഡൽഹിയിൽ തുടക്കം. ഉച്ചകോടിയിൽ പങ്കെടുക്കുന്നതിനായി വിവിധ ലോകനേതാക്കൾ ഡൽഹിയിൽ എത്തിച്ചേർന്നിട്ടുണ്ട്. ഇന്നും നാളെയുമാണ് ജി20 ഉച്ചകോടി നടക്കുക. മൂന്ന് സെഷനുകളായി നടക്കുന്ന ഉച്ചകോടിയിൽ വികസ്വര രാജ്യങ്ങളിലെ പ്രശ്‌നങ്ങൾക്ക് പ്രാധാന്യം നൽകുന്ന ചർച്ചകൾ ഉണ്ടാകും. ജി20 നടക്കുന്ന പശ്ചാത്തലത്തിൽ കനത്ത സുരക്ഷയാണ് ഡൽഹിയിൽ ഒരുക്കിയിരിക്കുന്നത്.
ജോ ബൈഡന് പുറമെ ബ്രിട്ടീഷ് പ്രധാനമന്ത്രി ഋഷി സുനക്, കനേഡിയൻ പ്രധാനമന്ത്രി ജസ്റ്റിൻ ട്രൂഡോ, ജപ്പാൻ പ്രധാനമന്ത്രി ഫുമിയോ കിഷിദ, ഓസ്ട്രേലിയ പ്രധാനമന്ത്രി ആന്തണി ആൽബനിസ്, സൗദി രാജകുമാരൻ മുഹമ്മദ് ബിൻ സൽമാൻ തുടങ്ങീ വിവിധ നേതാക്കൾ ഡൽഹിയിൽ എത്തിച്ചേർന്നിട്ടുണ്ട്. ഈ നേതാക്കളുമായി പ്രധാനമന്ത്രി ഉഭയകക്ഷി ചർച്ചകൾ നടത്തും. ചർച്ചയിൽ വാണിജ്യ, വ്യാപാര, പ്രതിരോധ മേഖലകളിൽ നിർണ്ണായകമായ ധാരണകൾ ഉണ്ടാകും. യുക്രെയ്ൻ-റഷ്യ വിഷയമുൾപ്പെടെ യോഗത്തിൽ ചർച്ചയായേക്കുമെന്ന് സൂചനയുണ്ട്.
അതേസമയം ഇന്ന് വൈകിട്ട്‌ നേതാക്കൾക്ക് രാഷ്ട്രപതി ദൗപദി മുർമു ഒരുക്കുന്ന അത്താഴ വിരുന്ന് നടക്കും. മുൻ പ്രധാനമന്ത്രിമാരായ മൻമോഹൻ സിംഗ്, എച്ച് ഡി ദേവഗൗഡ തുടങ്ങിയവരെ അത്താഴ വിരുന്നിലേക്ക് ക്ഷണിച്ചിട്ടുണ്ട്.
Discussion about this post