തൃശ്ശൂര് : ബാങ്ക് തട്ടിപ്പില് കെസി മൊയ്തീനോടൊപ്പം പി കെ ബിജുവിനും പങ്കുണ്ടെന്ന് അനില് അക്കരെ ആരോപിച്ചു. ഇഡി കോടതില് നല്കിയ റിപ്പോര്ട്ടില് പേര് വെളിപ്പെടുത്താത്ത മുന് എംപി പികെ ബിജുവാണെന്നാണ് അനില് അക്കരയുടെ വാദം.
‘ബിജുവിന്റെ മെന്ററാണ് കരുവന്നൂര് ബാങ്ക് തട്ടിപ്പു കേസിലെ ഒന്നാം പ്രതി പി സതീഷ് കുമാര്. കരുവന്നൂര് കൊള്ളയുടെ മുതല് ബിജു കൂടി പങ്കിട്ടെടുത്തെന്ന കാര്യം ഞെട്ടലുളവാക്കുന്നതാണ്. പികെ ബിജുവിനും എ.സി.മൊയ്തീനും കരുവന്നൂര് കൊള്ളയില് തുല്യ പങ്കാളിത്തമാണുള്ളത്’, അനില് അക്കര പറഞ്ഞു.
കരുവന്നൂര് ബാങ്ക് തട്ടിപ്പിനെക്കുറിച്ചു ബിജുവിന്റെ നേതൃത്വത്തില് അന്വേഷണം നടത്തിയ റിപ്പോര്ട്ടില് സതീഷ് കുമാറിനെക്കുറിച്ചു പരാമര്ശമില്ലാത്തതു തട്ടിപ്പു കേസിലെ ബന്ധം വ്യക്തമാക്കുന്നുവെന്നും അനില് ആരോപിച്ചു.
”ധൈര്യമുണ്ടെങ്കില് സിപിഎം ആ റിപ്പോര്ട്ട് പുറത്തുവിടട്ടെ. ഒരുമാസം കരുവന്നൂരില് താമസിച്ചാണു പികെ ബിജുവും ജില്ലാ സെക്രട്ടേറിയറ്റ് അംഗമായ പികെ ഷാജനും റിപ്പോര്ട്ട് തയാറാക്കിയത്. ബാങ്കിലെ ജീവനക്കാരുമായും ലോക്കല് കമ്മിറ്റി അംഗങ്ങളുമായും സംസാരിച്ചിരുന്നു. കോടികളുടെ ഇടപാടു നടത്തിയിട്ടും ബാങ്ക് ജീവനക്കാര് ഒന്നാം പ്രതിയുടെ പേരു പറഞ്ഞില്ലെന്നതു സംശയമുളവാക്കുന്നു. സതീഷിന് ഇതുമായി ബന്ധമുണ്ടെന്നു സിപിഎം കണ്ടെത്തിയിരുന്നുവെങ്കില് അതു ക്രൈംബ്രാഞ്ചിനെ അറിയിക്കാതിരുന്നതും ശരിയായില്ല. ഇതെല്ലാം വ്യക്തമാക്കാനായി ആ അന്വേഷണ റിപ്പോര്ട്ട് സിപിഎം പുറത്തു വിടണം”, അനില് കൂട്ടിച്ചേര്ത്തു.
Discussion about this post