സിംഗപ്പൂർ : എയർ ചൈന വിമാനത്തിന് തീ പിടിച്ചതിനെ തുടർന്ന് സിംഗപ്പൂരിൽ അടിയന്തര ലാൻഡിംഗ് നടത്തി. വിമാനത്തിന്റെ ഇടത് എഞ്ചിനാണ് തീപിടിച്ചത്. 155 പേരായിരുന്നു വിമാനത്തിൽ ഉണ്ടായിരുന്നത്. തീപിടുത്തത്തെ തുടർന്ന് 9 യാത്രക്കാർക്ക് പരിക്കേറ്റിട്ടുണ്ടെന്ന് അധികൃതർ അറിയിച്ചു.
തെക്കുപടിഞ്ഞാറൻ ചൈനീസ് നഗരമായ ചെങ്ഡുവിൽ നിന്ന് സിംഗപ്പൂരിലേക്ക് പറക്കുകയായിരുന്ന ഫ്ലൈറ്റ് CA403 വിമാനത്തിനാണ് തീ പിടിച്ചത്. യാത്രയ്ക്കിടെ ഫോർവേഡ് കാർഗോ ഹോൾഡിലും ലാവറ്ററിയിലും പുക കാണപ്പെടുകയും തീപിടുത്തം ഉണ്ടാവുകയും ചെയ്യുകയായിരുന്നു എന്ന് സിംഗപ്പൂരിലെ ചാംഗി എയർപോർട്ട് അധികൃതർ അറിയിച്ചു.
146 യാത്രക്കാരും ഒമ്പത് ജീവനക്കാരുമാണ് അപകട സമയത്ത് വിമാനത്തിലുണ്ടായിരുന്നത്. വിമാനം അടിയന്തരമായി ലാൻഡിംഗ് ചെയ്തതിനെത്തുടർന്ന് വിമാനത്താവളത്തിന്റെ റൺവേ കുറച്ചു സമയത്തേക്ക് അടച്ചിടേണ്ടതായി വന്നു. ഇതേ സമയത്ത് ഈ റൺവേയിൽ വന്നിറങ്ങേണ്ട വിമാനം ഇന്തോനേഷ്യയ്ക്കടുത്തുള്ള ബറ്റാമി ദ്വീപിലേക്ക് തിരിച്ചുവിട്ടതായും സിവിൽ ഏവിയേഷൻ അതോറിറ്റി ഓഫ് സിംഗപ്പൂർ അറിയിച്ചു. എന്നാൽ സംഭവത്തിൽ എയർ ചൈനയോ ചൈനീസ് അധികൃതരോ ഇതുവരെ പ്രതികരണങ്ങളൊന്നും നടത്തിയിട്ടില്ല.
