ആപ്പിൾ ഐഫോൺ 15 എത്തി; രണ്ട് മോഡലുകൾ; വില അറിയാം; സി ടൈപ്പ് ചാർജറിൽ ചാർജ്ജ് ചെയ്യാം; ഭാവിയിലേക്ക് വയർലെസ് ചാർജിംഗിനുളള സൗകര്യവും

ആപ്പിളിന്റെ ഐ ഫോൺ 15 പുറത്തിറക്കി. ഐഫോൺ 15, 15 പ്ലസ് എന്നീ മോഡലുകളാണ് ലോഞ്ച് ചെയ്തത്. സി ടൈപ്പ് ചാർജിംഗ് സൗകര്യവും 48 മെഗാപിക്‌സൽ ക്യാമറയും ഉൾപ്പെടെയുളള ഫീച്ചറുകളുമായിട്ടാണ് ഐ ഫോൺ സീരീസിലെ ഏറ്റവും പുതിയ ഫോൺ വിപണിയിൽ അവതരിപ്പിച്ചിരിക്കുന്നത്.

സി ടൈപ്പ് ചാർജിംഗ് ഫോണിന് കൂടുതൽ സ്വീകാര്യത നൽകുമെന്നാണ് ആപ്പിളിന്റെ പ്രതീക്ഷ. യുഎസ്ബി സി കണക്ടർ വഴി ചാർജ്ജ് ചെയ്യാം. ആഗോളതലത്തിൽ അംഗീകരിക്കപ്പെട്ട നിലവാരമുളള ചാർജിംഗ് സംവിധാനം ഉൾപ്പെടുത്തുകയായിരുന്നുവെന്നാണ് ആപ്പിൾ നൽകുന്ന വിശദീകരണം. എയർ പോഡും ആപ്പിൾ വാച്ചും ഐ ഫോണിൽ നിന്ന് നേരിട്ട് ചാർജ്ജ് ചെയ്യാനുളള സൗകര്യവും ഉണ്ട്. വയർലെസ് ചാർജിംഗ് സൗകര്യം ഉൾപ്പെടെ സപ്പോർട്ട് ചെയ്യുന്നതാണ് രണ്ട് മോഡലുകളും

ഐഫോൺ 14 ലേത് പോലെ 12 മെഗാപിക്‌സൽ മുൻക്യാമറയുമുണ്ട്. ഐ ഫോൺ 15 ന് ഇന്ത്യൻ രൂപ 67,000 ത്തോളം വരുമെന്നാണ് പ്രാഥമിക വിലയിരുത്തൽ. 15 പ്ലസ് ഫോണിന് 74,000 ത്തോളം രൂപയാണ് വില വരിക. ആപ്പിൾ സിഇഒ ടിം കുക്ക് പങ്കെടുത്ത പരിപാടിയിലാണ് ഫോണും ആപ്പിൾ വാച്ച് സീരീസ് 9 ഉം കമ്പനി പുറത്തിറക്കിയത്. ഇരുമോഡലുകളും കറുപ്പ്, നീല, മഞ്ഞ, പിങ്ക്, പച്ച തുടങ്ങി അഞ്ച് നിറങ്ങളിൽ ലഭ്യമാണ്.

ഐഫോൺ 15 ന് 6.1 ഇഞ്ച് ഡിസ്‌പ്ലെയും ഐ ഫോൺ 15 പ്ലസിന് 6.7 ഇഞ്ച് ഡിസ്‌പ്ലെയുമാണുളളത്.
ടെലിഫോട്ടോ ലെൻസ് ഉൾപ്പെടെയുളള ഫീച്ചറുകൾ ക്യാമറയ്ക്ക് കൂടുതൽ സ്വീകാര്യത നൽകും. സൂപ്പർ റെറ്റിന എക്‌സ്ഡിആർ ഡിസ്‌പ്ലെ കണ്ണിനെ ആയാസ രഹിതമാക്കുന്നു. ഫോട്ടോകളും വീഡിയോകളും കൂടുതൽ മികവുറ്റതാക്കാൻ എച്ച്ഡിആർ ബ്രൈറ്റ്‌നസ് 1600 നിറ്റ് വരെയാക്കി. പ്രകാശം ഉളള സ്ഥലങ്ങളിലും ഔട്ട് ഡോറിലും ഇത് പരമാവധി 2000 നിറ്റ് വരെയാകും.