എറണാകുളം : വരാപ്പുഴയില്‍ നാലംഗ കുടുംബത്തെ മരിച്ച നിലയില്‍ കണ്ടെത്തിയതില്‍ ദുരൂഹതയുണ്ടെന്ന് ആരോപിച്ച ബന്ധുക്കള്‍. ഓണ്‍ലൈന്‍ ലോണ്‍ നല്‍കുന്ന പണമിടപാട് സംഘത്തിന്റെ കെണിയില്‍പ്പെട്ടതാണ് കുടുംബത്തെ ആത്മഹത്യയിലേക്ക് നയിച്ചതെന്നാണ് സൂചന. മരിച്ച യുവതിയുടെ മോര്‍ഫ് ചെയ്ത അശ്ലീല ചിത്രങ്ങള്‍ ബന്ധുക്കള്‍ക്ക് ലഭിച്ചതിനാലാണ് സംശയം ശക്തമായത്. സംഭവത്തില്‍ അന്വേഷണം ആവശ്യപ്പെട്ട് നിജോയുടെ മാതാവ് പൊലീസില്‍ പരാതി നല്‍കി.
കുഞ്ഞുങ്ങളെ ശ്വാസം മുട്ടിച്ച് കൊലപ്പെടുത്തിയ ശേഷം ദമ്പതികള്‍ ആത്മഹത്യ ചെയ്യുകയായിരുന്നു. കടമക്കുടി മാടശ്ശേരി നിജോ (39), ഭാര്യ ശില്‍പ (29), മക്കളായ എയ്ബല്‍ (8), ആരോണ്‍ (6) എന്നിവരെയാണ് കഴിഞ്ഞ ദിവസം വീടിനകത്തു മരിച്ചനിലയില്‍ കണ്ടെത്തിയത്. കുടുംബത്തിന്റെ മരണശേഷം ശില്‍പയുടെ മോര്‍ഫ് ചെയ്ത അശ്ലീല ചിത്രങ്ങള്‍ ബന്ധുക്കളുടെ ഫോണിലേക്കു വരികയായിരുന്നു. ലോണ്‍ തിരിച്ചടച്ചില്ലെങ്കില്‍ ചിത്രം പ്രചരിപ്പിക്കുമെന്നും ഭീഷണിയും അതില്‍ ഉള്‍പ്പെട്ടിരുന്നു.
ലോണ്‍ തിരിച്ചടവ് മുടങ്ങിയെന്നും എത്രയും പെട്ടെന്ന് പണം തിരിച്ചടയ്ക്കണമെന്നും ഭീഷണിപ്പെടുത്തിയുള്ള സന്ദേശങ്ങളാണ് യുവതിയുടെ ബന്ധുക്കളുടെ ഫോണിലേക്ക് ലഭിച്ചത്. യുവതിയുടെ മോര്‍ഫ് ചെയ്ത ചിത്രങ്ങള്‍ സന്ദേശത്തോടൊപ്പം ലഭിച്ചിട്ടുണ്ട്. ഒരു യുവതിയുടെ ശബ്ദമാണ് സന്ദേശത്തിലുള്ളത്. ഹിന്ദിയിലാണ് സന്ദേശമെങ്കിലും ഹിന്ദി അറിയാവുന്ന ആളെപ്പോലെയല്ല സംസാരിച്ചിരിക്കുന്നതെന്നും പരാതിയില്‍ പറയുന്നു.
സംഭവത്തില്‍ പൊലീസ് വിശദമായ അന്വേഷണം ആരംഭിച്ചു. യുവതി ഇത്തരത്തില്‍ പണമിടപാട് നടത്തിയതായോ ഭീഷണിയുള്ളതായോ ബന്ധുക്കള്‍ക്ക് അറിവില്ല. എന്നാല്‍ സാമ്പത്തിക ബാധ്യതയാണു മരണ കാരണമെന്നാണ് ആത്മഹത്യ കുറിപ്പില്‍ പറയുന്നത്. അതേസമയം മരിച്ച നാലു പേരുടെയും സംസ്‌കാരം ഇന്ന് നടന്നു.
ഇന്നലെയാണ് കടമക്കുടിയിലെ വീട്ടില്‍ ദമ്പതികളെയും മക്കളെയും മരിച്ച നിലയില്‍ കണ്ടെത്തിയത്. താഴത്തെ നിലയില്‍ താമസിക്കുന്ന അമ്മയും സഹോദരനും മുകളിലത്തെ നിലയില്‍ എത്തി വാതിലില്‍ മുട്ടിവിളിച്ചെങ്കിലും പ്രതികരണമുണ്ടായില്ല. ഇതോടെ നാട്ടുകാരുടെ സഹായത്തോടെ വാതില്‍ പൊളിച്ച് അകത്തു കടന്നു. കുഞ്ഞുങ്ങള്‍ കട്ടിലില്‍ അനക്കമറ്റ നിലയിലും നിജോയും ശില്‍പയും തൂങ്ങിയ നിലയിലുമായിരുന്നു.വിദേശത്തേക്കു പോകാനുള്ള നടപടിക്രമങ്ങള്‍ പൂര്‍ത്തിയാക്കിയ ശില്‍പ ഇന്നലെ ഇറ്റലിയിലേക്കു പോകുമെന്നാണ് നാട്ടുകാരെ അറിയിച്ചിരുന്നത്.
Discussion about this post