ശ്രീനഗർ: രാജ്യത്തേയ്ക്ക് നുഴഞ്ഞു കയറാൻ പുതുവഴി തേടി പാക് ഭീകരർ. നേപ്പാൾ വഴി റോഡ് മാർഗ്ഗമാണ് ഇപ്പോൾ ഭീകരർ ഇന്ത്യയിലേക്ക് കടക്കുന്നത് എന്നാണ് വിവരം. ജമ്മു കശ്മീരിൽ ഭീകര വിരുദ്ധ പ്രവർത്തനങ്ങൾ സൈന്യം ശക്തമാക്കിയത് വലിയ തിരിച്ചടിയായിരുന്നു. ഇതേ തുടർന്നാണ് ഭീകരർ നേപ്പാൾ വഴി ഇന്ത്യയിലേക്ക് കടക്കുന്നത്.
രഹസ്യാന്വേഷണ ഏജൻസികളിൽ നിന്നും ലഭിച്ച വിവരങ്ങൾ ഉദ്ദരിച്ച് ദേശീയ മാദ്ധ്യമങ്ങളാണ് നിർണായക വിവരങ്ങൾ പുറത്തുവിട്ടിരിക്കുന്നത്. ജമ്മു കശ്മീരിന്റെ അതിർത്തി മേഖലകളിൽ പഴുതടച്ച സുരക്ഷയാണ് ഒരുക്കിയിരിക്കുന്നത്. ഭീകരരുടെ നുഴഞ്ഞു കയറ്റ ശ്രമങ്ങൾക്ക് ശക്തമായ തിരിച്ചടിയും സുരക്ഷാ സേന നൽകുന്നത്. ഈ സാഹചര്യത്തിലാണ് മറ്റൊരു മാർഗ്ഗം ഭീകരർ സ്വീകരിച്ചിരിക്കുന്നത്.
ഇത്തരത്തിൽ അതിർത്തി കടന്ന് എത്തിയ ഭീകരരാണ് കഴിഞ്ഞ ദിവസം ആക്രമണം നടത്തിയത് എന്ന സൂചനയും രഹസ്യാന്വേഷണ ഏജൻസികൾ പുറത്തുവിടുന്നുണ്ട്. ഏത് വിധേനയും ഇന്ത്യയിലെ സമാധാന അന്തരീക്ഷം തകർക്കുകയാണ് പാകിസ്താന്റെ ലക്ഷ്യം. അതിനാലാണ് തുടർച്ചയായി ഭീകരരെ രാജ്യത്തേക്ക് അയക്കുന്നത്. നേപ്പാൾ അതിർത്തി വഴി റോഡ് മാർഗ്ഗം ഭീകരരെ എത്തിക്കുന്നത് വലിയ ആശങ്കയുണ്ടാക്കുന്നുണ്ടെന്നും മാദ്ധ്യമങ്ങൾ റിപ്പോർട്ട് ചെയ്യുന്നു.
