തിരുവനന്തപുരം: ബംഗാൾ ഉൾക്കടലിൽ ന്യൂനമർദ്ദം. ഇതിന്റെ സ്വാധീന ഫലമായി സംസ്ഥാനത്ത് ശക്തമായ മഴ ലഭിക്കും. വരും മണിക്കൂറിൽ ന്യൂനമർദ്ദം ശക്തി പ്രാപിച്ച് അതിതീവ്ര ന്യൂനമർദ്ദമാകാനാണ് സാദ്ധ്യത.
വടക്ക് പടിഞ്ഞാറൻ ബംഗാൾ ഉൾക്കടലിൽ പശ്ചിമ ബംഗാൾ – ഒഡീഷ തീരത്തിന് സമീപമായാണ് ന്യൂനമർദ്ദം രൂപപ്പെട്ടത്. അടുത്ത രണ്ട് ദിവസം പടിഞ്ഞാറ് വടക്ക് പടിഞ്ഞാറ് ദിശയിൽ സഞ്ചരിച്ച് വടക്കൻ ഒഡീഷ- തെക്കൻ ഝാർഖണ്ഡിന് മുകളിലൂടെ നീങ്ങാനാണ് സാദ്ധ്യത. സഞ്ചാരത്തിനിടെ ന്യൂനമർദ്ദം ശക്തി പ്രാപിച്ച് അതിതീവ്ര ന്യൂനമർദ്ദമായേക്കാമെന്നാണ് കരുതുന്നത്.
നിലവിൽ തെക്ക് പടിഞ്ഞാറൻ രാജസ്ഥാന് മുകളിലായി ചക്രവാത ചുഴി നിലനിൽക്കുന്നു. ഇതും കേരളത്തിലെ കാലാവസ്ഥയിൽ സ്വാധീനം ചെലുത്തുന്നുണ്ട്. അതിനാൽ വരുന്ന അഞ്ച് ദിവസവും സംസ്ഥാനത്ത് ശക്തമായ മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രം അറിയിക്കുന്നത്.
വരും മണിക്കൂറിൽ മഴയുടെ ശക്തി വർദ്ധിക്കുമെന്നതിനാൽ സംസ്ഥാനത്തെ രണ്ട് ജില്ലകളിൽ യെല്ലോ അലർട്ട് ഏർപ്പെടുത്തിയിട്ടുണ്ട്. തിരുവനന്തപുരം, ഇടുക്കി എന്നീ ജില്ലകളിലാണ് യെല്ലോ അലർട്ട് ഏർപ്പെടുത്തിയിട്ടുള്ളത്. മഴയുടെ ശക്തി അനുസരിച്ച് വരും ദിവസങ്ങളിലെ മഴ മുന്നറിയിപ്പുകളിൽ മാറ്റം ഉണ്ടാകുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.
Discussion about this post