ധാക്ക: സാമൂഹിക മാദ്ധ്യമത്തിൽ സ്ത്രീവിരുദ്ധ പരാമർശവുമായി ബംഗ്ലാദേശ് ക്രിക്കറ്റ് താരം തൻസീം ഹസൻ സാക്കിബ്. ജോലിക്ക് പോകുന്ന സ്ത്രീകളെയും കോളേജുകളിൽ ആൺകുട്ടികൾക്കൊപ്പം പഠിക്കുന്ന പെൺകുട്ടികളെയും അപമാനിക്കുന്ന തരത്തിലുള്ളതായിരുന്നു സാക്കിബിന്റെ പോസ്റ്റ്.
ഭാര്യ ജോലിക്ക് പോയാൽ അവളുടെ സൗന്ദര്യം നഷ്ടമാകും. ഭാര്യ ജോലിക്ക് പോയാൽ കുടുംബം നശിക്കും. ഭാര്യ ജോലിക്ക് പോയാൽ മുഖാവരണം നശിക്കും. ഭാര്യ ജോലിക്ക് പോയാൽ സമൂഹവും നശിക്കും. ഇതായിരുന്നു സാക്കിബിന്റെ ഫേസ്ബുക്ക് പോസ്റ്റ്.
ഏഷ്യാ കപ്പിലൂടെ അന്താരാഷ്ട്ര ഏകദിനത്തിൽ അരങ്ങേറ്റം കുറിച്ച സാക്കിബിന്റെ പോസ്റ്റിനെതിരെ രൂക്ഷമായ വിമർശനങ്ങളാണ് ഉയരുന്നത്. വിമർശനം കടുത്തതോടെ പരാമർശത്തിൽ ഖേദം പ്രകടിപ്പിച്ച് സാക്കിബ് രംഗത്തെത്തിയതായി ബംഗ്ലാദേശ് ക്രിക്കറ്റ് ബോർഡ് അറിയിച്ചു.
പരാമർശത്തിൽ സാക്കിബ് മാപ്പ് പറഞ്ഞതായി ബിസിബി ഓപ്പറേഷൻസ് മേധാവി ജലാൽ യൂനുസ് അറിയിച്ചു. താൻ ഒരു സ്ത്രീവിരുദ്ധനല്ലെന്നും തന്റെ അമ്മയും ഒരു സ്ത്രീയാണെന്നും സാക്കിബ് പറഞ്ഞതായി യൂനുസ് കൂട്ടിച്ചേർത്തു. ഭാവിയിൽ ഇത്തരം പരാമർശങ്ങൾ ഒഴിവാക്കണമെന്ന് ബംഗ്ലാദേശ് ക്രിക്കറ്റ് ബോർഡ് താരത്തോട് ആവശ്യപ്പെട്ടതായും ജലാൽ യൂനുസ് വ്യക്തമാക്കി.
Discussion about this post