ന്യഡൽഹി: വനിതാ സംവരണ ബില്ല് ലോക്സഭയിൽ പാസാക്കി തിരിച്ചെത്തിയ ബിജെപി എംപി മനോജ് തിവാരിക്ക് ഭാര്യ നൽകിയ സ്വീകരണം വൈറലാകുന്നു. ദീപം കൊണ്ട് ആരതി ഉഴിഞ്ഞ് നെറ്റിയിൽ തിലകം ചാർത്തിയാണ് ഭാര്യ അദ്ദേഹത്തെ സ്വീകരിച്ചത്.
അപ്രതീക്ഷിതമായ സ്വീകരണത്തിൽ അമ്പരപ്പിലായ എംപി ഭാര്യ സുരഭി തിവാരിയോട് എന്ത് സംഭവിച്ചുവെന്ന് ചോദിക്കുന്നുണ്ട്. താങ്കൾ ഈ നിമിഷത്തിൽ മോദിജിയുടെ സൈനികനായതിൽ എനിക്ക് അഭിമാനമുണ്ട് എന്നായിരുന്നു മറുപടി. സമൂഹമാദ്ധ്യമങ്ങളിലൂടെ മനോജ് തിവാരി തന്നെയാണ് ഭാര്യ ഒരുക്കിയ സ്വീകരണത്തിന്റെ വീഡിയോ പങ്കുവെച്ചത്.
ഗായികയും സാമൂഹ്യ പ്രവർത്തകയുമാണ് സുരഭി തിവാരി. തിലകമണിയിക്കുമ്പോൾ ഇത്രയും സന്തോഷമോയെന്നും അതിശയത്തോടെ അദ്ദേഹം ചോദിക്കുന്നുണ്ട്. വനിതാ സംവരണബില്ലിലെ ചർച്ചകൾ കണ്ടോ എന്നും ആരാഞ്ഞ ശേഷമാണ് എംപി അകത്തേക്ക് കയറുന്നത്.
ഇന്നലെ രാത്രിയോടെയാണ് ലോക്സഭ വനിതാ സംവരണ ബില്ല് പാസാക്കിയത്. പാർലമെന്റിലും നിയമസഭകളിലും വനിതകൾക്ക് 33 ശതമാനം സംവരണം നൽകുന്നതാണ് ബില്ല്. 454 പേർ ബില്ലിനെ അനുകൂലിച്ചപ്പോൾ രണ്ട് എംപിമാർ മാത്രമാണ് എതിർത്തത്.
Discussion about this post