ഡല്‍ഹി: ഡല്‍ഹിയില്‍ സായുധസേന പ്രത്യേകാധികാര നിയമം ( അഫ്‌സ്പാ) പ്രഖ്യാപിക്കണമെന്നാവശ്യപ്പെട്ട് ബി.ജെ.പി നേതാവ് സുബ്രഹ്മണ്യം സ്വാമി. നാഷല്‍ ഹെറാള്‍ഡ് കേസില്‍ 19ന് കോണ്‍ഗ്രസ് അധ്യക്ഷ സോണിയ ഗാന്ധിയും ഉപാധ്യക്ഷന്‍ രാഹുല്‍ ഗാന്ധിയും ഡല്‍ഹി പട്യാല കോടതിയില്‍ ഹാജരാകാനിരിക്കെയാണ് സ്വാമിയുടെ ആവശ്യം.
തന്റെ ട്വിറ്റര്‍ അക്കൗണ്ടില്‍ കൂടി സ്വാമി തന്നെയാണ് ഇക്കാര്യം വെളിപ്പെടുത്തിയത്. ഇക്കാര്യമാവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് സ്വാമി കത്തയച്ചിട്ടുണ്ട്. സോണിയ ഗാന്ധിയും, രാഹുല്‍ ഗാന്ധിയും കോടതിയില്‍ ഹാജരാകുന്ന 19 ന് പ്രതിഷേധ സൂചകമായി യൂത്ത് കോണ്‍ഗ്രസ് പ്രവര്‍ത്തകര്‍ കേടതിയിലേക്ക് മാര്‍ച്ച് നടത്തുമെന്ന് പ്രഖ്യാപിച്ചിട്ടുണ്ട്. ഇത് ചൂണ്ടിക്കാണിച്ചാണ് ഡല്‍ഹിയില്‍ അഫ്‌സ്പാ പ്രഖ്യാപിക്കണമെന്ന് സ്വാമി ആവശ്യപ്പെട്ടിരിക്കുന്നത്.
കേസില്‍ കോണ്‍ഗ്രസ് അധ്യക്ഷ സോണിയാ ഗാന്ധിയും ഉപാധ്യക്ഷന്‍ രാഹുല്‍ ഗാന്ധിയും പ്രവര്‍ത്തകസമിതി അംഗങ്ങളായ മോത്തിലാല്‍ വോറ, ഓസ്‌കാര്‍ ഫെര്‍ണാണ്ടസ് എന്നിവരും സാം പിത്രോഡയും വിചാരണക്കോടതിയില്‍ നേരിട്ട് ഹാജരാകണം. നേരിട്ട് ഹാജരാകുന്നതില്‍നിന്നൊഴിവാക്കണമെന്ന അപേക്ഷ ഡല്‍ഹി ഹൈക്കോടതി തള്ളിയിരുന്നു. സോണിയയ്ക്കും രാഹുലിനുമെതിരെ കേസ്് നല്‍കിയതും സുബ്രഹ്മണ്യന്‍ സ്വാമി തന്നെയാണ്.
Discussion about this post