ഭോപ്പാൽ: മധ്യപ്രദേശിൽ സർക്കാർ ജോലികളിൽ സ്ത്രീകൾക്ക് 35 ശതമാനം സംവരണം ഏർപ്പെടുത്തിയെന്ന് മുഖ്യമന്ത്രി ശിവരാജ് സിംഗ് ചൗഹാൻ. അതിനായി സർക്കാർ പുതിയ വിജ്ഞാപനം പുറത്തിറക്കിയെന്നും അദ്ദേഹം പറഞ്ഞു.
ഇതോടെ സംസ്ഥാനത്ത് വനം വകുപ്പ് ഒഴികെയുള്ള തസ്തികകളിൽ സ്ത്രീകൾക്ക് 35 ശതമാനം സംവരണം ആയിരിക്കും ലഭിക്കുക. അധ്യാപക തസ്തികകളിൽ സ്ത്രീകൾക്ക് 50 ശതമാനവും സംവരണം ഏർപ്പെടുത്തുമെന്നും മുഖ്യമന്ത്രി പറഞ്ഞു. സംസ്ഥാനത്തെ തദ്ദേശസ്വയംഭരണ സ്ഥാപനങ്ങളിൽ ഉൾപ്പെടെയുള്ള സർക്കാർ ജോലികളിൽ സ്ത്രീകൾക്ക് മുൻഗണന നൽകും.പെൺകുട്ടികളുടെ വിദ്യാഭ്യാസത്തിനായുള്ള ചിലവുകൾ സർക്കാർ വഹിക്കുമെന്നും ശിവരാജ് സിംഗ് ചൗഹാൻ പറഞ്ഞു. പെൺകുട്ടികൾക്ക് മികച്ച വിദ്യാഭ്യാസം ഉറപ്പാക്കുക എന്നതാണ് സർക്കാരിന്റെ ലക്ഷ്യമെന്നും ശിവരാജ് സിംഗ് ചൗഹാൻ കൂട്ടിച്ചേർത്തു.
പുതിയ പാർലമെന്റ് മന്ദിരത്തിലെ ലോക്സഭയുടെ ആദ്യ സമ്മേളനത്തിലാണ് സ്ത്രീകൾക്ക് 33 ശതമാനം സംവരണം നൽകുന്ന ബിൽ അവതരിപ്പിക്കുന്നത്. ‘നാരി ശക്തി വന്ദൻ അധീനിയം’ എന്ന പേരിലാണ് ബിൽ അവതരിപ്പിച്ചത്. രാജ്യസഭ ഐകകണ്ഠ്യേനയാണ് ബിൽ പാസ്സാക്കിയത്. വനിതാ സംവരണ ബിൽ രാഷ്ട്രപതി ദ്രൗപതി മുർമുവിൽ നിന്ന് അനുമതി ലഭിച്ചതോടെ ലോക്സഭയിലും സംസ്ഥാന നിയമസഭകളിലും വനിതകൾക്ക് 33 ശതമാനം സംവരണം ആയിരിക്കും ഇനി മുതൽ ലഭ്യമാവുക.
Discussion about this post