ജറുസലേം : അതിര്‍ത്തി കടന്നുള്ള പാലസ്തീന്‍ ഭീകരാക്രമണത്തില്‍ ഹമാസ് ബന്ദികളാക്കിയിരിക്കുന്നത് 199 പൗരന്‍മാരെയെെന്ന് ഇസ്രയേല്‍ സൈന്യം. ഇസ്രയേല്‍ സൈനിക വക്താവ് ഡാനിയേല്‍ ഹഗാരിയാണ് ഇക്കാര്യം വെളിപ്പെടുത്തിയത്. നേരത്തെ 155 പേരെ തടങ്കലിലാക്കിയതായാണ് അറിയിച്ചിരുന്നത്. ബന്ദികളെ തടവിലാക്കിയിരിക്കുന്ന സ്ഥലങ്ങള്‍ കണ്ടെത്താനുള്ള ശ്രമത്തിലാണെന്നും ബന്ദികളെ അപകടത്തിലാക്കുന്ന തരത്തില്‍ ആക്രമണം നടത്തില്ലെന്നും ഇസ്രയേല്‍ സൈനിക വക്താവ് വ്യക്തമാക്കി.
“ഹമാസ് ബന്ദികളാക്കിയവരുടെ എണ്ണം 199 ആയി ഉയര്‍ന്നിട്ടുണ്ട്. ഇവരുടെ കുടുംബങ്ങളുമായി ഞങ്ങള്‍ ബന്ധപ്പെടുകയും വിവരങ്ങള്‍ അറിയിക്കുകയും ചെയ്തിട്ടുണ്ട്. തടവിലാക്കപ്പെട്ടവരെ കണ്ടെത്താനുള്ള ശ്രമം തുടരുകയാണ്”, സൈനിക വക്താവ് ഡാനിയല്‍ ഹഗാരി പറഞ്ഞു.
അതേസമയം ഗാസ പിടിച്ചെടുക്കാന്‍ ഇസ്രയേലിന് താല്‍പര്യമില്ലെന്നും എന്നാല്‍ ഹമാസിനെ ഉന്‍മൂലനം ചെയ്യുമെന്നും യുഎന്നിലെ ഇസ്രയേല്‍ അംബാസഡര്‍ ഗിലാര്‍ഡ് എര്‍ദന്‍ വ്യക്തമാക്കി. ഗാസ കീഴടക്കാനോ അവിടെ തുടരാനോ ഇസ്രയേലിന് താല്‍പര്യമില്ല. നിലനില്‍പ്പിന് വേണ്ടിയുള്ള പോരാട്ടമാണ് നടക്കുന്നത്. ഹമാസിനെ ഇല്ലാതാക്കുകയാണ് ലക്ഷ്യം. അവരുടെ ശക്തി ക്ഷയിപ്പിക്കാനുള്ള എല്ലാ നടപടികളും സ്വീകരിക്കുമെന്നും എര്‍ദന്‍ പറഞ്ഞു.
