തൃശ്ശൂർ: കേരളത്തിലെ നവരാത്രി ആഘോഷത്തിൽ പങ്കെടുത്ത് നടി ജാൻവി കപൂർ. തൃശ്ശൂരിൽ നടന്ന ആഘോഷപരിപാടിയിൽ ആണ് താരം പങ്കുകൊണ്ടത്. ദേവിയെ സാഷ്ടാംഗം വണങ്ങുന്ന നടിയുടെ ചിത്രങ്ങൾ സോഷ്യൽ മീഡിയയിൽ വൈറൽ ആയിട്ടുണ്ട്.
ഞായറാഴ്ച നടന്ന പരിപാടിയിൽ ആണ് ജാൻവി കപൂർ പങ്കെടുത്തത്. പ്രമുഖ ജ്വല്ലറിയായിരുന്നു ആഘോഷം സംഘടിപ്പിച്ചത്. നവരാത്രി ആഘോഷത്തിൽ പങ്കെടുക്കുന്ന ചിത്രങ്ങളും വീഡിയോയും താരം തന്നെയാണ് ഇൻസ്റ്റഗ്രാമിലൂടെ പുറത്തുവിട്ടത്. നിമിഷ നേരം കൊണ്ടുതന്നെ ഇത് സോഷ്യൽ മീഡിയയിൽ വ്യാപകമായി പ്രചരിച്ചു.
ബോളിവുഡിൽ തിരക്കേറിയ നടിമാരിൽ ഒരാളാണ് ജാൻവി. താരജാഡകൾ ഇല്ലാതെ സാരിയിൽ ദേവിയെ സാഷ്ടാംഗം പ്രണമിക്കുന്ന ജാൻവിയുടെ ചിത്രങ്ങളാണ് ആരാധകരുടെ പ്രിയം പിടിച്ചുപറ്റിയത്. ലാവണ്ടർ നിറത്തിലുള്ള ടിഷ്യൂ സിൽക്ക് സാരിയാണ് താരം ധരിച്ചിരുന്നത്.
ചിത്രങ്ങൾ പ്രചരിച്ചതോടെ നിരവധി പേർ ജാൻവിയെ പ്രകീർത്തിച്ച് രംഗത്ത് എത്തി. എല്ലായ്പ്പോഴും ഹിന്ദു സംസ്കാരം കാത്ത് സൂക്ഷിക്കുന്ന വ്യക്തിയാണെന്ന് ഒരിക്കൽ കൂടി ജാൻവി തെളിയിച്ചതായി ആരാധകർ പറയുന്നു. പിങ്ക് സാരിയിൽ ജാൻവി അതീവ സുന്ദരിയാണെന്ന കമന്റുകളും ഉണ്ട്. സംസ്കാരവും സൗന്ദര്യവും ഒത്തിണങ്ങിയ നടിയാണ് ജാൻവിയെന്നും ആളുകൾ പറയുന്നു.
Discussion about this post