നടന് വിനായകനുമായി ബന്ധപ്പെട്ട പൊലീസ് സ്റ്റേഷന് വിവാദത്തില്, മന്ത്രി സജി ചെറിയാന്റെ പരാമർശത്തെ പരിഹസിച്ച് നടൻ ഹരീഷ് പേരടി. ലോകം മുഴുവൻ അരങ്ങാണെന്ന് പറഞ്ഞ ഷേക്സ്പ്പിയറുടെ ആ വലിയ നാടക വചനത്തിന്റെ പിൻബലത്തിലായിരുന്നു പോലീസ് സ്റ്റേഷൻ അരങ്ങായി മാറിയത് എന്ന് സാംസ്കാരിക മന്ത്രി സജി ചെറിയാൻ സാർ പറയാതെ പറഞ്ഞപ്പോളാണ് തനിക്കും ബോധം വന്നത് എന്നായിരുന്നു അദ്ദേഹത്തിന്റെ പരിഹാസം. പ്രധാന കഥാപാത്രം അഭിനയിച്ച വിനായകനും വില്ലനായ ഓഫീസറും കലക്കിയെന്നും തൊട്ടടുത്ത പോലിസ് സ്റ്റേഷനിൽ ഈ നാടകം കളിക്കുമ്പോൾ താനും കാണുമെന്നും ഹരീഷ് പേരടി ഫേസ്ബുക്കിൽ കുറിച്ചു.
വിനാകയന്റേത് കലാപ്രവര്ത്തനമായി കണ്ടാല് മതി. കലാകാരന്മാര്ക്ക് ഇടയ്ക്കിടെ കലാപ്രവര്ത്തനം വരും. അത് പൊലീസ് സ്റ്റേഷനായി പോയെന്നേയുളളു നമ്മള് അതില് സങ്കടപ്പെട്ടിട്ട് കാര്യമില്ലെന്നുമായിരുന്നു മന്ത്രിയുടെ പരാമർശം.
ഫേസ്ബുക്ക് പോസ്റ്റിന്റെ പൂർണരൂപം
“All the world’s a stage” ..അതെ..ലോകം മുഴുവൻ അരങ്ങാണെന്ന് പറഞ്ഞ ഷേക്സ്പ്പിയറുടെ ആ വലിയ നാടക വചനത്തിന്റെ പിൻബലത്തിലായിരുന്നു ഇന്നലെ പോലീസ് സ്റ്റേഷൻ അരങ്ങായി മാറിയത് എന്ന് നമ്മുടെ സാംസ്കാരിക മന്ത്രി സജി ചെറിയാൻ സാർ പറയാതെ പറഞ്ഞപ്പോളാണ് എനിക്കും ബോധം വന്നത്…ഇത് നാടകമാണെന്ന് അറിയാതെ ഇതിനെ ജനകിയ പ്രശനങ്ങളുമായി താരത്മ്യം ചെയ്ത എനിക്കൊന്നും നാടകക്കാരൻ എന്ന പറയാനുള്ള യോഗ്യതപോലും നഷ്ടമായി…സജി സാർ നിങ്ങൾ വേറെ ലെവലാണ്..അഭിനന്ദനങ്ങൾ …”തീ-പ-കു-വിനെ പേടിപ്പിക്കല്ലെ”എന്ന നാടകത്തിലെ പ്രധാന കഥാപാത്രം അഭിനയിച്ച വിനായകൻ ശരിക്കും ഞെട്ടിച്ചു…ആ പോലീസ് ഓഫിസറുടെ വില്ലൻ വേഷം അഭിനയിച്ച നടനും കലക്കി…ഇതിന്റെ രചനയും നിർമ്മാണവും ആരാണെന്ന് അറിയില്ലെങ്കിലും അവർക്കും അഭിനന്ദനങ്ങൾ…വർണ്ണ വിവേചനത്തിന്റെയും ജാതി രാഷ്ട്രിയത്തിന്റെയും മഹത്തായ സന്ദേശം സാധാരണ ജനങ്ങളിലെത്തിക്കുന്ന ഈ നാടകം കേരളത്തിലെ എല്ലാ പോലീസ് സ്റ്റേഷനുകളിലും കളിക്കപ്പെടേണ്ടതാണ്…തൊട്ടടുത്ത പോലിസ് സ്റ്റേഷനിൽ കളിക്കുമ്പോൾ ഞാനും കാണും…അഭിവാദ്യങ്ങൾ …
