ശ്രീനഗർ: ജമ്മു കശ്മീരിൽ പോലീസുകാർക്ക് നേരെ ഭീകരാക്രമണം. ഭീകരരുടെ വെടിയേറ്റ് പോലീസുകാരന് ഗുരുതരമായി പരിക്കേറ്റു. ശ്രീനഗറിൽ വൈകീട്ടോടെയായിരുന്നു ആക്രമണം ഉണ്ടായത്. ഭീകരർക്കായി പോലീസ് ഊർജ്ജിത അന്വേഷണം ആരംഭിച്ചു.
ഇൻസ്‌പെക്ടറായ മസ്‌റൂർ അഹമ്മദിന് നേരെയാണ് ആക്രമണം ഉണ്ടായത്. നഗരത്തിൽ മറ്റ് ഉദ്യോഗസ്ഥർക്കൊപ്പം പട്രോളിംഗ് നടത്തുകയായിരുന്നു അഹമ്മദ്. ഇതിനിടെയായിരുന്നു അദ്ദേഹത്തിന് നേരെ ആക്രമണം ഉണ്ടായത്. വാഹനത്തിൽ എത്തിയ ഭീകരരുടെ സംഘം ആക്രമിച്ച ശേഷം കടന്നു കളയുകയായിരുന്നു.
വെടിയേറ്റ് അഹമ്മദ് നിലത്ത് വീണു. ഇതോടെ ഭീകരർ വാഹനങ്ങളിൽ രക്ഷപ്പെടുകയായിരുന്നു. പോലീസ് പിന്തുടർന്നു എങ്കിലും പിടികൂടാൻ കഴിഞ്ഞില്ല. സഹപ്രവർത്തകരാണ് അദ്ദേഹത്തെ ആശുപത്രിയിൽ എത്തിച്ചത്. ചികിത്സയിൽ കഴിയുന്ന അദ്ദേഹത്തിന്റെ ആരോഗ്യനില തൃപ്തികരമാണെന്നാണ് വിവരം. സംഭവത്തിന്റെ പശ്ചാത്തലത്തിൽ പ്രദേശത്ത് സുരക്ഷ വർദ്ധിപ്പിച്ചിട്ടുണ്ട്.
Discussion about this post