ആലപ്പുഴ: കാട്ടൂരിൽ ശ്രീനാരായണ ഗുരു മന്ദിരത്തിന് നേരെ ആക്രമണം. മന്ദിരത്തിന്റെ ഗെയ്റ്റും കാണിക്ക വഞ്ചിയും അക്രമികൾ തകർത്തു. ഇന്ന് പുലർച്ചെ അഞ്ച് മണിയോടെയായിരുന്നു ആക്രമണം ഉണ്ടായത്.
രാവിലെ ഇവിടേയ്ക്ക് എത്തിയ ജീവനക്കാരാണ് സംഭവം ആദ്യം കണ്ടത്. ഉടനെ വിവരം അധികൃതരെ അറിയിക്കുകയായിരുന്നു. ഗേറ്റ് പിഴുതെടുത്ത് ദൂരേയ്ക്ക് എറിഞ്ഞിട്ടുണ്ട്. കാണിക്ക വഞ്ചിയും പാര ഉപയോഗിച്ച് തകർത്തിട്ടുണ്ട്. ഇതിന് പുറമേ മന്ദിരത്തിന്റെ വളപ്പിൽ സ്ഥാപിച്ച കൊടി തോരണങ്ങളും ഫ്ളക്സ് ബോർഡുകളും നശിപ്പിച്ചിട്ടുണ്ട്. മോഷണ ശ്രമമാണെന്നായിരുന്നു പ്രാഥമിക നിഗമനം. എന്നാൽ പിന്നീട് നടത്തിയ പരിശോധനയിൽ കരുതിക്കൂട്ടിയുള്ള ആക്രമണമാണെന്ന് വ്യക്തമായി.
കാണിക്ക വഞ്ചിയിൽ നിന്നും പണമോ, മറ്റ് സാധനങ്ങളോ കാണാതെ പോയിട്ടില്ല. ഇതോടെയാണ് സംഭവം മോഷണ ശ്രമം അല്ലെന്ന് വ്യക്തമായത്. സാമൂഹ്യവിരുദ്ധരാണ് സംഭവത്തിന് പിന്നിൽ എന്നാണ് സൂചന. അധികൃതർ മണ്ണഞ്ചേരി പോലീസ് സ്റ്റേഷനിൽ പരാതി നൽകിയിട്ടുണ്ട്. പോലീസ് സ്ഥലത്ത് എത്തി പരിശോധന നടത്തി. സംഭവത്തിൽ ഊർജ്ജിത അന്വേഷണം ആരംഭിച്ചതായി പോലീസ് അറിയിച്ചു.
Discussion about this post