ഡല്‍ഹി: കേന്ദ്ര ധനകാര്യ മന്ത്രി അരുണ്‍ ജെയ്റ്റിലിക്കെതിരെ അഴിമതി ആരോപണമുന്നയിച്ചതിന് ബിജെപിയില്‍ നിന്നും സസ്‌പെന്‍ഡ് ചെയ്യപ്പെട്ട എംപി കീര്‍ത്തി ആസാദിനു പിന്തുണയുമായി പാര്‍ട്ടി നേതാവ് സുബ്രഹ്മണ്യം സ്വാമി. കീര്‍ത്തി ആസാദ് ഇപ്പോഴും ബിജെപി അംഗമാണെന്നും, അതിനാല്‍ പാര്‍ട്ടി അയച്ച നോട്ടീസിന് മറുപടി പറയാന്‍ താന്‍ സഹായിക്കുമെന്നും സ്വാമി പറഞ്ഞു.
കീര്‍ത്തി ആസാദിനെപ്പോലുളള സത്യസന്ധരെ പാര്‍ട്ടി നഷ്ടപ്പെടുത്തുമെന്ന് കരുതുന്നില്ലെന്നും അദ്ദേഹം വ്യക്തമാക്കി. അതേസമയം അഴിമതിക്കെതിരെ പ്രതികരിച്ചതിനാണോ കീര്‍ത്തി ആസാദിനെ പുറത്താക്കിയതെന്ന് പ്രധാനമന്ത്രി നരേന്ദ്രമോദി വ്യക്തമാക്കണമെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി പറഞ്ഞു.
പാര്‍ട്ടിയില്‍ നിന്ന് തന്നെ സസ്‌പെന്‍ഡ് ചെയ്തതില്‍ കൃത്യമായ വിശദീകരണം നല്‍കണമെന്നും, സസ്‌പെന്‍ഷന്‍ നോട്ടിസില്‍ പുറത്താക്കിയതിന്റെ കാരണം വ്യക്തമാക്കിയിട്ടില്ലെന്നും കീര്‍ത്തി ആസാദ് പറഞ്ഞു. കൂടാതെ ഡിഡിസിഎ അഴിമതിയില്‍ പൊതുതാത്പര്യ ഹര്‍ജി ഫയല്‍ ചെയ്യുമെന്നും അദ്ദേഹം വ്യക്തമാക്കി. പാര്‍ട്ടിക്കെ തിരെയോ സര്‍ക്കാരിനെതിരെയോ താനൊന്നും പറഞ്ഞിട്ടില്ല. അഴിമതിക്കെതിരെ മാത്രമാണ് പറഞ്ഞതെന്നും അദ്ദേഹം വ്യക്തമാക്കി.
Discussion about this post