ന്യൂഡൽഹി: മുതിർന്ന ബിജെപി നേതാവ് എൽകെ അദ്വാനിക്ക് ജൻമദിന ആശംസകളുമായി വീട്ടിലെത്തി പ്രധാനമന്ത്രി നരേന്ദ്രമോദിയും ബിജെപി നേതാക്കളും. വൈകിട്ട് മുതിർന്ന ബിജെപി നേതാക്കളും കേന്ദ്രമന്ത്രിമാരുമായ രാജ്നാഥ് സിംഗ്, അമിത് ഷാ എന്നിവർക്കൊപ്പമാണ് പ്രധാനമന്ത്രി നരേന്ദ്രമോദി എൽകെ അദ്വാനിയുടെ വീട്ടിലെത്തി ആശംസകൾ അറിയിച്ചത്.
ഭാരതത്തിന് പ്രിയപ്പെട്ട നാല് നേതാക്കളും ഒരുമിച്ചിരിക്കുന്ന ചിത്രങ്ങൾ സമൂഹമാദ്ധ്യമങ്ങളിലും വൈറലായി. നേതാക്കൾ പങ്കുവെച്ച ചിത്രങ്ങൾ നിമിഷ നേരങ്ങൾക്കുള്ളിൽ ആയിരങ്ങളാണ് ട്വിറ്ററിലും മറ്റും ലൈക്ക് ചെയ്തത്.
അദ്വാനിക്കൊപ്പം ഏറെ നേരം ചിലവഴിച്ച ശേഷമാണ് നേതാക്കൾ മടങ്ങിയത്. അദ്വാനി ജി എന്നും ഞങ്ങൾക്ക് കരുത്തിന്റെ നെടുംതൂണാണെന്ന് സന്ദർശനത്തിന് ശേഷം അമിത് ഷാ ട്വിറ്ററിൽ കുറിച്ചു. രാഷ്ട്രീയത്തിൽ അപാരമായ അറിവും വിപുലമായ അനുഭവസമ്പത്തുമുളള നേതാവാണ് അദ്വാനിജിയെന്നും കേന്ദ്ര ആഭ്യന്തരമന്ത്രി കൂട്ടിച്ചേർത്തു. ദൈവം ദീർഘായുസ്സ് നൽകട്ടെയെന്നും അദ്ദേഹത്തിന്റെ നല്ല ആരോഗ്യത്തിനായി ആശംസകൾ നേരുന്നുവെന്നും അമിത് ഷാ പറഞ്ഞു.
അദ്വാനിജിക്ക് ആരോഗ്യവും ദീർഘായുസ്സും നൽകട്ടെയെന്ന് രാജ്നാഥ് സിംഗും ചിത്രം പങ്കുവെച്ച് ട്വിറ്ററിൽ കുറിച്ചു. രാവിലെ തന്നെ നേതാക്കൾ അദ്ദേഹത്തിന് ജൻമദിനാശംസകൾ നേർന്നിരുന്നു. മുൻ ഉപപ്രധാനമന്ത്രി കൂടിയായ എൽകെ അദ്വാനിയുടെ 96 ാം ജൻമദിനമാണ് ആഘോഷിച്ചത്. രാവിലെ മുൻ ഉപരാഷ്ട്രപതി വെങ്കയ്യ നായിഡു, നടനും മുൻ എംപിയുമായ സുരേഷ് ഗോപി തുടങ്ങിയവർ അദ്വാനിയെ വീട്ടിലെത്തി സന്ദർശിച്ചിരുന്നു.
Discussion about this post