തിരുവനന്തപുരം : ട്രാഫിക് നിയമലംഘനം നടത്തുന്നത് പോലീസ് വാഹനങ്ങൾ ആയാലും പിഴ ഈടാക്കുമെന്ന് ഡിജിപി. പോലീസ് വാഹനങ്ങൾ നിയമലംഘനം നടത്തിയാൽ ഓടിക്കുന്ന ഉദ്യോഗസ്ഥരിൽ നിന്നായിരിക്കും പിഴ ഈടാക്കുക എന്ന് ഡിജിപി വ്യക്തമാക്കി. ഉദ്യോഗസ്ഥർ പിഴ അടച്ചതിന്റെ വിശദാംശങ്ങൾ 10 ദിവസത്തിനകം അറിയിക്കണമെന്നും ഡിജിപി നിർദേശിച്ചു.
റോഡുകളിൽ എ ഐ ക്യാമറകൾ സ്ഥാപിച്ചതോടെ നിരവധി പോലീസ് വാഹനങ്ങൾക്ക് ആണ് ട്രാഫിക് നിയമലംഘനം നടത്തിയതിന്റെ പേരിൽ പിഴ ചുമത്തപ്പെട്ടിട്ടുള്ളത്. ഈ സാഹചര്യത്തിലാണ് ഡിജിപിയുടെ പുതിയ ഉത്തരവ്. നിയമം നടപ്പിലാക്കുന്ന ഏജൻസിയെന്ന നിലയിൽ പൊലീസിന് ട്രാഫിക് നിയമങ്ങൾ പാലിക്കാൻ ബാധ്യതയുണ്ടെന്ന് ഡിജിപിയുടെ നിർദേശത്തിൽ വ്യക്തമാക്കുന്നു.
ട്രാഫിക് നിയമം ലംഘിക്കുന്നവരാണ് പിഴ അടയ്ക്കേണ്ടത്. വാഹനം ഓടിക്കുന്ന ഉദ്യോഗസ്ഥനിൽ നിന്നും പിഴ തുക ഈടാക്കും. സർക്കാരിന്റെ പണം ഇതിനായി ചെലവാക്കാനാകില്ല. പിഴ അടച്ച ഉദ്യോഗസ്ഥരുടെ വിവരങ്ങൾ സംസ്ഥാനതലത്തിൽ ശേഖരിച്ച് അറിയിക്കാനും ഡിജിപി നിർദേശം നൽകി.
