ആഗോളതലത്തിൽ തന്നെ സെർവിക്കൽ കാൻസർ രോഗബാധിതരുടെ എണ്ണം വർദ്ധിക്കുന്നതായാണ് പഠനറിപ്പോർട്ടുകൾ സൂചിപ്പിക്കുന്നത്. സ്ത്രീകളിൽ പൊതുവേ ബ്രസ്റ്റ് ക്യാൻസറും സെർവിക്കൽ ക്യാൻസറും അടുത്തകാലങ്ങളിൽ കൂടുതലായി കണ്ടു വരുന്നതായി പറയുന്നു. നേരത്തെ കണ്ടെത്തി ശരിയായ ചികിത്സ നൽകാൻ കഴിഞ്ഞാൽ ഈ രണ്ട് പ്രശ്നങ്ങളെയും തരണം ചെയ്യാൻ കഴിയുന്നതാണ്. സർവിക്കൽ കാൻസർ കണ്ടെത്തുന്നതിനായി സ്ത്രീകളിൽ ഉണ്ടാകുന്ന ഈ ലക്ഷണങ്ങളാണ് ശ്രദ്ധിക്കേണ്ടത്.
ഗർഭാശയത്തെ യോനിയുമായി ബന്ധിപ്പിക്കുന്ന താഴത്തെ ഇടുങ്ങിയ അറ്റമാണ് സെർവിക്സ് എന്നറിയപ്പെടുന്നത്. സെർവിക്സിൽ ഉണ്ടാകുന്ന കോശങ്ങളുടെ വളർച്ചയാണ് സെർവിക്കൽ കാൻസർ. ഹ്യൂമൻ പാപ്പിലോമ വൈറസിന്റെ വിവിധ സ്ട്രെയിനുകളാണ് മിക്ക സെർവിക്കൽ ക്യാൻസറുകൾക്കും കാരണമാകുന്നത്. തുടക്കത്തിൽ, സെർവിക്കൽ ക്യാൻസറിന് സാധാരണയായി രോഗലക്ഷണങ്ങൾ ഉണ്ടാകില്ല, ഇത് കണ്ടുപിടിക്കാൻ പ്രയാസമാണ്. ക്യാൻസർ പടർന്നതിന് ശേഷമാണ് സാധാരണയായി ലക്ഷണങ്ങൾ ആരംഭിക്കുന്നത്.
അസാധാരണമായി ഉണ്ടാകുന്ന രക്തസ്രാവമാണ് സെർവിക്കൽ ക്യാൻസറിന്റെ ഒരു പ്രധാന ലക്ഷണം. ലൈംഗിക ബന്ധത്തിന് ശേഷം യോനിയിൽ രക്തസ്രാവം ഉണ്ടാവുക,
ആർത്തവവിരാമത്തിനു ശേഷം യോനിയിൽ രക്തസ്രാവം കാണപ്പെടുക എന്നിവയും സെർവിക്കൽ ക്യാൻസറിന്റെ ലക്ഷണങ്ങൾ ആകാം.
സാധാരണയേക്കാൾ നീണ്ടുനിൽക്കുന്ന ആർത്തവങ്ങൾ അല്ലെങ്കിൽ ആർത്തവങ്ങൾക്കിടയിൽ യോനിയിൽ രക്തസ്രാവം
യോനിയിൽ നിന്നുള്ള സ്രവങ്ങൾ ഉണ്ടാവുന്നത്, വെള്ളമുള്ളതോ ശക്തമായ ദുർഗന്ധമുള്ളതോ രക്തം അടങ്ങിയതോ ആയ സ്രവങ്ങൾ,
പെൽവിക് ഭാഗത്തു വേദന, ലൈംഗിക ബന്ധത്തിൽ ഏർപ്പെടുന്ന വേളയിൽ വേദന എന്നിവയും സെർവിക്കൽ ക്യാൻസറിന്റെ ലക്ഷണങ്ങൾ ആകാം.
സെർവിക്കൽ ക്യാൻസർ സ്ത്രീകളുടെ ഏത് പ്രായത്തിലും ബാധിക്കാവുന്നതാണ്. ലക്ഷണങ്ങൾ നേരത്തെ തന്നെ തിരിച്ചറിയുകയും വിദഗ്ധ ചികിത്സ ലഭ്യമാക്കുകയും ചെയ്യുന്നത് വഴി സെർവിക്കൽ ക്യാൻസറിൽ നിന്നും മുക്തി നേടാവുന്നതാണ്.
Discussion about this post