തിരുവനന്തപുരം :നവകേരള സദസിനായി മുഖ്യമന്ത്രിയും മന്ത്രിമാരും ആഡംബര വാഹനത്തിൽ യാത്ര ചെയ്യുന്നതിനെതിരെ വിമർശനവുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ. നവകേരള യാത്രയ്ക്ക് വേണ്ടി ഒരു കോടി അഞ്ചുലക്ഷം രൂപ മുടക്കി ആഡംബര ബസ് വാങ്ങുന്നത് സർക്കാരിന്റെ ധൂർത്ത് ആണെന്ന് സുരേന്ദ്രൻ പറഞ്ഞു. നവകേരള സദസിന്റെ കാശ് പിരിക്കാൻ വേണ്ടിയാണ് യാത്ര നടത്തുന്നത്. ഈ യാത്രകൊണ്ട് ജനങ്ങൾക്ക് യാതൊരു ഗുണവും ഉണ്ടാകില്ലെന്നും അദ്ദേഹം പറഞ്ഞു.
സാധാരണ കെഎസ്ആര്‍ടിസി ബസ് ഉപയോഗിക്കുന്നത് നേതാക്കളുടെ അന്ത്യ യാത്രയ്ക്ക് വേണ്ടിയാണ്. നവകേരള യാത്രയിലൂടെ കേരളത്തിലെ അവസാന കമ്യൂണിസ്റ്റ്‌ സർക്കാരിന്റെ അന്ത്യ യാത്രയാണ് നടക്കുന്നത്. അതിന്റെ കാലൻ പിണറായി വിജയൻ ആണെന്നും സുരേന്ദ്രൻ പറഞ്ഞു.
നവകേരള സദസിനായി മുഖ്യമന്ത്രിയും മന്ത്രിമാരും ആഡംബര ബസിൽ പോകുന്നതിനെ ചൊല്ലിയുള്ള വിവാദം കൊഴുക്കുകയാണ്.മന്ത്രിമാർ സ്വന്തം വാഹനം വിട്ട് പ്രത്യേക ബസിൽ പോകുന്നത് ചെലവ് കുറയുമെന്നാണ് ഗതാഗത മന്ത്രിയുടെ ന്യായീകരണം. വിവരങ്ങൾ ഒന്നും പുറത്തുവിടരുതെന്നാണ് കെഎസ്ആര്‍ടിസിയ്ക്ക് നൽകിയിട്ടുള്ള കർശന നിർദ്ദേശം. കഴിഞ്ഞ ദിവസം ആഡംബര ബസ് വാങ്ങാനായി ഒരു കോടി അഞ്ചുലക്ഷം രൂപ അനുവദിച്ച കാര്യം മാത്രമേ പുറത്തു വിട്ടിട്ടുള്ളൂ. ജനങ്ങൾ കാശിനായി ബുദ്ധിമുട്ടുന്ന ഈ സമയത്ത് ആഡംബര ബസ് ഇറക്കുന്നതിനെതിരെ വിവിധ കോണുകളിൽ നിന്നും വിമർശനം ഉയരുന്നുണ്ട്.
