ശ്രീനഗർ: ജമ്മു കശ്മീരിലെ രജൗറിയിലെ ബാജി മാലിലെ വനമേഖലയിൽ സൈനികരും ഭീകരരും തമ്മിലുണ്ടായ ഏറ്റുമുട്ടലിൽ നാല് സൈനികർക്ക് വീരമൃത്യു. രണ്ട് ക്യാപ്റ്റൻമാർ ഉൾപ്പെടെ നാല് സൈനികരാണ് വീരമൃത്യുവരിച്ചത്. മൂന്ന് പേർക്ക് പരിക്കേറ്റിട്ടുണ്ട്. ഇവരെ ഉധംപൂരിലെ ആർമി കമാൻഡ് ആശുപത്രിയിലേക്ക് മാറ്റി.
വനത്തിൽ ഭീകരർ നുഴഞ്ഞുകയറിയതായി രഹസ്യവിവരം ലഭിച്ചതിനെ തുടർന്ന് സൈന്യത്തിൻറെയും പോലീസിൻറെയും പ്രത്യേക സേനയും സംയുക്ത ഓപ്പറേഷൻ ആരംഭിച്ചു. തുടർന്ന് ഭീകരർ സൈനികർക്ക് നേരെ ആക്രമണം നടത്തുകയും വെടിവയ്പ്പ് ഉണ്ടാവുകയുമായിരുന്നു.
സംഭവത്തിൽ മൂന്ന് ഭീകരരെ സൈന്യം വളഞ്ഞിട്ടുണ്ട്. ഇവരെ കീഴ്‌പ്പെടുത്താനുള്ള ശ്രമങ്ങൾ നടത്തുകയാണ്. മൂന്ന് ഭീകരരിൽ രണ്ട് പേർ വിദേശപൗരന്മാരാണെന്നും ഞായറാഴ്ച മുതൽ പ്രദേശത്ത് ചുറ്റിക്കറങ്ങുകയാണെന്നും വിവരം ലഭിച്ചതായി സൈനിക വൃത്തങ്ങൾ വ്യക്തമാക്കി.
Discussion about this post