ആഡംബര വിവാഹങ്ങള്‍ നിരന്തരം വാര്‍ത്തകളില്‍ നിറയുന്ന കാലത്ത് ഓടിക്കൊണ്ടിരുന്ന യാത്രാ തീവണ്ടിയില്‍ പൂക്കളും അലങ്കാരവുമൊന്നും ഇല്ലാതെ നടന്ന ഒരു വിവാഹവും വാര്‍ത്തയാകുകയാണ്. വധൂവരന്‍മാര്‍ ആരാണെന്നോ ഏത് തീവണ്ടിയാണിതെന്നോ വ്യക്തമായിട്ടില്ല. എന്നാല്‍ ട്വിറ്റര്‍ ഉള്‍പ്പെടെയുളള സമൂഹമാദ്ധ്യമങ്ങളില്‍ വിവാഹ ദൃശ്യങ്ങള്‍ വൈറലായിക്കഴിഞ്ഞു.
ഓടിക്കൊണ്ടിരുന്ന ട്രെയിനില്‍ ചുറ്റിനും നില്‍ക്കുന്ന സഹയാത്രക്കാരെ സാക്ഷിയാക്കിയാണ് യുവാവ് പെണ്‍കുട്ടിയെ താലികെട്ടുന്നത്. അതിന് ശേഷം ഒപ്പമുണ്ടായിരുന്നവര്‍ നല്‍കിയ പുഷ്പമാലയും ഇരുവരും പരസ്പരം അണിയിച്ചു. പെണ്‍കുട്ടി യുവാവിന്റെ കാല്‍ തൊട്ട് വന്ദിക്കുന്നതും വീഡിയോയില്‍ കാണാം.
യാത്രാ തീവണ്ടിയുടെ ലോക്കല്‍ കംപാര്‍ട്ട്മെന്റിലാണ് വിവാഹം നടന്നതെന്നാണ് ദൃശ്യങ്ങളില്‍ നിന്നുളള പ്രാഥമിക നിഗമനം. പശ്ചിമബംഗാളിലെ അസന്‍സോളില്‍ നിന്ന് ഝാര്‍ഖണ്ഡിലെ ജാസിദിയിലേക്ക് പോകുന്ന തീവണ്ടിയാണിതെന്ന് ചില മാദ്ധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍ ഇക്കാര്യം സ്ഥിരീകരിച്ചിട്ടില്ല.
ഒപ്പമുണ്ടായിരുന്ന യാത്രക്കാരില്‍ ഒരുപാട് പേര്‍ മൊബൈലില്‍ വിവാഹ ദൃശ്യങ്ങള്‍ ചിത്രീകരിക്കുന്നുണ്ടായിരുന്നു. വീഡിയോക്ക് താഴെ നിരവധി പേരാണ് കമന്റുകളുമായി എത്തിയിട്ടുളളത്. ലളിതമായ വിവാഹമാണെന്നും വിവാഹത്തിന്റെ പേരിലുള്ള ധൂര്‍ത്ത് ഒഴിവാക്കിയത് മാതൃകാപരമെന്നുമൊക്കെയാണ് കമന്റുകള്‍.
വിമാനത്തിലും ആഡംബര റിസോര്‍ട്ടുകളിലുമുളള വിവാഹങ്ങള്‍ നിരന്തരം വാര്‍ത്തകളില്‍ ഇടംപിടിക്കുന്നതിനിടെയാണ് ഓടുന്ന ട്രെയിനില്‍ ആഡംബരങ്ങള്‍ ഒന്നുമില്ലാതെ നടന്ന വിവാഹവും ശ്രദ്ധ നേടുന്നത്.
Discussion about this post