കൃത്രിമബുദ്ധി അതിന്റെ സമാരംഭം മുതൽ ഹിറ്റായി മാറിയ ഒന്നാണ് പുതിയ ഭാഷകൾ പഠിക്കുന്ന വിദ്യാർത്ഥികൾ മുതൽ സങ്കീർണ്ണമായ ഗവേഷണത്തിനായും വരെ എഐ ഉപകരണങ്ങൾ ഉപയോഗിച്ച് വരുന്നു. രാജ്യങ്ങളെ മുതൽ വൻകിട കോർപ്പറേറ്റ് കമ്പനികൾ വരെ എല്ലാവരേയും എഐ സഹായിക്കുന്നു. ഇക്കാലത്ത്, ആളുകൾക്ക് അവരുടെ ജോലി എളുപ്പമാക്കാൻ കഴിയുന്ന നിരവധി എഐ ടൂളുകൾ ഓൺലൈനിൽ ലഭ്യമാണ്. എന്നിരുന്നാലും, ഓൺലൈൻ കുറ്റകൃത്യങ്ങൾ ചെയ്യുന്നതിനായി ഈ എഐ ടൂളുകളും തട്ടിപ്പുകാർ ഉപയോഗിച്ച് വരുന്നു.
ആർട്ടിഫിഷ്യൽ ഇന്റലിജൻസ് ഉപയോഗിച്ച് സ്ത്രീകളുടെ ഫോട്ടോകളിൽനിന്ന് വസ്ത്രങ്ങൾ മാറ്റി നഗ്‌നരാക്കി കാട്ടുന്ന ആപ്പുകൾക്കും വെബ്‌സൈറ്റുകൾക്കും ജനപ്രീതി കൂടുന്നതായി ഗവേഷകർ ചൂണ്ടിക്കാണിക്കുന്നു. സ്ത്രീകളുടെ ഫോട്ടോകളിൽനിന്ന് അവരുടെ വസ്ത്രങ്ങൾ നീക്കം ചെയ്യാൻ ഉപയോഗിക്കുന്ന ആപ്പുകളാണ് ഇവ. സെപ്തംബറിൽ മാത്രം 24 കോടി ആളുകളാണ് ഇത്തരത്തിലുള്ള ‘നഗ്നരാക്കൽ’ വെബ്‌സൈറ്റുകളിൽ സന്ദർശനം നടത്തിയതെന്നാണ് സോഷ്യൽ നെറ്റ്വർക് അനാലിസിസ് കമ്പനിയായ ഗ്രാഫിക്കയുടെ റിപ്പോർട്ട്. എഐയുടെ സഹായത്തോടെ സൃഷ്ടിക്കുന്ന ഡീപ് ഫെയ്ക് ഫോട്ടോകൾ സമൂഹമാദ്ധ്യമത്തിൽ വ്യാപകമായി പ്രചരിക്കുന്നതിനിടെയാണ് ഇത്തരത്തിൽ ഒരു റിപ്പോർട്ട് പുറത്തുവരുന്നത്. എഐ ഉപയോഗിച്ച് അനുമതിയില്ലാതെ പോണോഗ്രഫി ഉള്ളടക്കങ്ങൾ നിർമിക്കുന്നത് വർധിക്കുന്നതിന്റെ സൂചനയാണ് ഈ റിപ്പോർട്ട്.
ജനപ്രിയ സോഷ്യൽ മീഡിയാ പ്ലാറ്റ്ഫോമുകളിലൂടെയാണ് ഇങ്ങനെയുള്ള ‘ന്യൂഡിഫൈ’ സേവനങ്ങൾ പ്രചരിപ്പിക്കപ്പെടുന്നത്. എക്സ്, റെഡ്ഡിറ്റ് പോലുള്ള പ്ലാറ്റ്ഫോമുകളിൽ ഇത്തരം സേവനങ്ങളുടെ ലിങ്കുകൾ പരസ്യം ചെയ്യപ്പെടുന്നതിൽ അതിഭീമമായ വർധനവുണ്ടായിട്ടുണ്ട്. ലൈംഗികതയുമായി ബന്ധപ്പെട്ട ഉള്ളടക്കങ്ങൾ അടങ്ങിയ പരസ്യങ്ങൾ പ്രോത്സാഹിപ്പിക്കില്ലെന്ന് പറയുമ്പോഴാണ് ഇത്തരം പരസ്യങ്ങൾ വ്യാപകമാകുന്നത്.എക്സ്, ഗൂഗിൾ, യൂട്യൂബ് തുടങ്ങിയ സേവനങ്ങളിൽ ന്യൂഡിഫൈ സേവനങ്ങൾ പരസ്യം ചെയ്യപ്പെടുന്നുണ്ട്.
ഇത്തരം ആപ്പുകൾ ഗുരുതരമായ നിയമ – ധാർമ്മിക പ്രശ്‌നങ്ങൾക്ക് കാരണമാകുന്നുവെന്നും റിപ്പോർട്ട് ചൂണ്ടിക്കാട്ടുന്നു. വ്യക്തികളുടെ സമ്മതമില്ലാതെ നിർമ്മിക്കപ്പെടുന്ന ഇത്തരം നഗ്‌ന ചിത്രങ്ങൾ വ്യാപകമായി വിതരണം ചെയ്യപ്പെടുന്നു. പലപ്പോഴും ഇര ഇതിനെ കുറിച്ച് അറിയുന്നു പോലുമില്ല. നേരത്തെ ഉണ്ടായിരുന്നതിനെക്കാൾ മികച്ച ചിത്രങ്ങൾ സൃഷ്ടിക്കാൻ കഴിയുന്നുവെന്നത് ഇത്തരം ആപ്പുകളുടെ ജനപ്രീയത വർദ്ധിപ്പിച്ചെന്നും റിപ്പോർട്ട് ചൂണ്ടിക്കാട്ടുന്നു. ഡീപ്‌ഫൈക്ക് പ്രോണാഗ്രാഫിക്കെതിരെ ഒരു രാജ്യത്തും നിയമങ്ങളില്ലെന്നത് കുറ്റവാളികൾക്ക് വീണ്ടും കുറ്റകൃത്യത്തിനുള്ള അവസരമൊരുക്കുന്നു.
Discussion about this post