മുസാഫർനഗർ: ഓടുന്ന ട്രെയിനിനുള്ളിലെ തണുപ്പ് അകറ്റാൻ യുവാക്കൾ കണ്ടെത്തിയ വിദ്യ കണ്ട് ഞെട്ടി ആർപിഎഫ് ഉദ്യോഗസ്ഥർ. ജനറൽ കമ്പാർട്ട്മെന്റിൽ ചാണകവരളി കൊണ്ടുവെച്ച് അതിന് തീയിട്ട് പതിനഞ്ചോളം പേർ ചുറ്റുമിരുന്ന് തീകാഞ്ഞതാണ് സുരക്ഷാ ഉദ്യോഗസ്ഥരെ ഞെട്ടിച്ചത്. അൽപ്പം കൂടി വൈകിയിരുന്നുവെങ്കിൽ വൻ ദുരന്തമായിരുന്നു ഉണ്ടാവുക.
ഉത്തർപ്രദേശിലെ അലിഗറിൽ വ്യാഴാഴ്ചയായിരുന്നു സംഭവം.അസമിൽ നിന്ന് ഡൽഹിയിലേക്കുള്ള സമ്പർക്കക്രാന്തി സൂപ്പർഫാസ്റ്റ് എക്സ്പ്രസിലായിരുന്നു ഈ തീകായൽ നടന്നത്. ട്രെയിനിനകത്ത് ഡ്യൂട്ടിയിലുണ്ടായിരുന്ന ആർപിഎഫ് ഉദ്യോഗസ്ഥർ ഒരു ജനറൽ കോച്ചിൽ നിന്ന് പുക ഉയരുന്നത് ശ്രദ്ധയിൽപെട്ടാണ് അവിടേക്ക് എത്തിയത്.
ചന്ദൻ കുമാർ, ദേവേന്ദ്ര സിങ് എന്നിവരാണ് അറസ്റ്റിലായത്. മറ്റ് 14 യാത്രക്കാരെ കൂടി കസ്റ്റഡിയിലെത്തിരുന്നെങ്കിലും താക്കീത് നൽകി വിട്ടയച്ചു. ഇന്ത്യൻ ശിക്ഷാ നിയമത്തിലെയും റെയിൽവെ നിയമത്തിലെയും നിരവധി വകുപ്പുകൾ ചുമത്തി കേസെടുത്ത ഇരുവരും റിമാൻഡിലാണ്.
Discussion about this post