എറണാകുളം : കൊച്ചിൻ ഷിപ്പ് യാർഡിൽ പൂർത്തീകരിച്ചിരിക്കുന്ന 2769 കോടി രൂപയുടെ വികസന പദ്ധതികൾ ബുധനാഴ്ച പ്രധാനമന്ത്രി നരേന്ദ്രമോദി ഉദ്ഘാടനം നിർവഹിക്കും. കപ്പലുകളുടെ അറ്റകുറ്റപ്പണി നടത്തുന്നതിനുള്ള ഷിപ്പ് റിപ്പയർ യാർഡും ഇന്ത്യയിലെ തന്നെ ഏറ്റവും വലിയ ഡ്രൈ ഡോക്കുകളിൽ ഒന്നും അടങ്ങുന്നവയാണ് ഈ പദ്ധതികൾ.
പ്രതിപക്ഷം നൂറിലധികം കപ്പലുകൾക്ക് അറ്റകുറ്റപ്പണി നടത്താൻ കഴിയുന്ന രീതിയിലാണ് പുതിയ ഷിപ്പ് റിപ്പയർ യാർഡ് പൂർത്തീകരിച്ചിരിക്കുന്നത്. വെല്ലിങ്ടൺ ഐലൻഡിൽ ആണ് ഈ റിപ്പയർ യാർഡ് നിർമ്മിച്ചിട്ടുള്ളത്. വലിയ കപ്പലുകൾ ഉൾപ്പെടെ നിർമിക്കാനുള്ള സൗകര്യങ്ങൾ ഉൾപ്പെടുത്തി കൊണ്ടാണ് കൊച്ചിൻ ഷിപ്പ് യാർഡിലെ ഡ്രൈ ഡോക്ക് ഒരുക്കിയിട്ടുള്ളത്.
ഇന്ത്യൻ സൈന്യത്തിനായി രാജ്യത്തെ ആദ്യത്തെ തദ്ദേശീയ വിമാനവാഹിനി കപ്പലായ ഐ എൻ എസ് വിക്രാന്ത് നിർമ്മിച്ചു നൽകിയത് കൊച്ചിൻ ഷിപ്പ് യാർഡിൽ നിന്നുമായിരുന്നു. കൊച്ചിൻ ഷിപ്പ് യാർഡിലെ പുതിയ പദ്ധതികൾ കേരളത്തിന്റെ എം എസ് എം ഇ മേഖലക്കും ഗുണകരമാകുമെന്ന് വ്യവസായ മന്ത്രി പി രാജീവ് വ്യക്തമാക്കി. ഒരുകാല താമസവും വരാതെ പറഞ്ഞ സമയത്ത് തന്നെ ഇത്രയും വലിയ പദ്ധതി പൂർത്തീകരിക്കാൻ സാധിച്ചതിൽ കേരളത്തിനും അഭിമാനിക്കാം എന്നും വ്യവസായ മന്ത്രി അഭിപ്രായപ്പെട്ടു.
Discussion about this post