ലണ്ടൻ : അയോധ്യയുടെ ആവേശം അങ്ങ് അതിരുകൾക്കപ്പുറത്തേക്കും വ്യാപിക്കുകയാണ്. ഇന്ന് ബ്രിട്ടീഷ് പാർലമെന്റ് രാമമന്ത്രങ്ങളാൽ ആവേശം നിറച്ച കാഴ്ചയാണ് കാണാനായത്. യുകെ പാർലമെന്റിലാകെ ജയ് ശ്രീറാം വിളികൾ നിറഞ്ഞുനിന്നു. യുകെയിലെ സനാതൻ സൻസ്തയാണ് രാമക്ഷേത്ര പ്രതിഷ്ഠാദിനവുമായി ബന്ധപ്പെട്ട് ബ്രിട്ടീഷ് പാർലമെന്റിലെ ആഘോഷങ്ങൾക്ക് നേതൃത്വം നൽകിയത്.
ബ്രിട്ടീഷ് പാർലമെന്റിലെ ഹൗസ് ഓഫ് കോമൺസ് കമ്മിറ്റി ഹാളിലാണ് എംപി ബോബ് ബ്ലാക്ക്മാൻ ആതിഥേയത്വം വഹിച്ച രാമക്ഷേത്ര പ്രാണ പ്രതിഷ്ഠയുമായി ബന്ധപ്പെട്ട ആഘോഷങ്ങൾ നടന്നത്. ശംഖനാദം മുഴക്കിക്കൊണ്ട് ഭക്തിനിർഭരമായി ആരംഭിച്ച ആഘോഷങ്ങളിൽ നിരവധി കീർത്തനങ്ങളും ഭജനകളും ആലപിക്കപ്പെട്ടു.
ശ്രീരാമനെ യുഗപുരുഷ് എന്ന് വാഴ്ത്തുന്ന ഒരു ഭജനയോടെയായിരുന്നു ബ്രിട്ടീഷ് പാർലമെന്റിൽ നടന്ന ആഘോഷങ്ങൾക്ക് ആരംഭം ആയത്. ഭഗവത്ഗീതയുടെ പന്ത്രണ്ടാം അധ്യായം വായിക്കുകയും ചെയ്തു. രാജ് രാജേശ്വർ ഗുരു, സ്വാമി സൂര്യപ്രഭ ദീദി എന്നിവർ ആത്മീയ പരിപാടികൾക്ക് നേതൃത്വം നൽകി.
അയോധ്യയിലെ രാമജന്മഭൂമി ഭൂമി ക്ഷേത്രത്തിനുള്ള യുകെയിലെ ഇന്ത്യൻ വംശജരുടെ പിന്തുണ പ്രഖ്യാപിച്ചു കൊണ്ടുള്ള യുകെ പ്രഖ്യാപനം ജനുവരി 22ന് നടക്കുന്ന പ്രാണപ്രതിഷ്ഠ ചടങ്ങിന് മുൻപായി അയോധ്യയിലെ ക്ഷേത്ര ട്രസ്റ്റിന് സമർപ്പിക്കും എന്നും ബ്രിട്ടനിലെ ഇന്ത്യൻ വംശജർ അറിയിച്ചു. യുകെയിൽ ഉടനീളമുള്ള 200ലധികം ക്ഷേത്രങ്ങളും കമ്മ്യൂണിറ്റി സംഘടനകളും അസോസിയേഷനുകളും ഒപ്പുവെച്ചതാണ് യുകെ പ്രഖ്യാപനം.
