ഇന്ത്യൻ ടെന്നീസ് താരം സാനിയ മിർസയുടെ മുൻ ഭർത്താവും പാകിസ്താൻ ക്രിക്കറ്റ് താരവുമായ ഷൊയ്ബ് മാലിക് വീണ്ടും വിവാഹിതനായി. ഷൊയ്ബ് മാലികിന്റെ മൂന്നാമത്തെ വിവാഹമാണിത്. ഉറുദു സിനിമ ടിവി രംഗത്ത് ശ്രദ്ധേയയായ പാകിസ്താൻ നടി സന ജാവേദിനെ ആണ് ഇത്തവണ ഷൊയ്ബ് വിവാഹം ചെയ്തിരിക്കുന്നത്.
സാനിയ മിർസയുമായി ഷൊയ്ബ് മാലിക് വിവാഹമോചിതനായി എന്ന രീതിയിലുള്ള വാർത്തകൾ പ്രചരിച്ചിരുന്നെങ്കിലും ഇരുവരും ഇക്കാര്യം സ്ഥിരീകരിച്ചിരുന്നില്ല. ഇതിനിടയിലാണ് സമൂഹമാദ്ധ്യമങ്ങളിലൂടെ ഷൊയ്ബ് തന്റെ പുതിയ വിവാഹത്തിന്റെ ചിത്രങ്ങൾ പങ്കുവെച്ചത്. സന ജാവേദിന്റെ രണ്ടാമത്തെ വിവാഹമാണ് ഇത്. പാക് ഗായകനായ ഉമൈർ ജയ്സ്വാളിനെ ആയിരുന്നു സന ആദ്യം വിവാഹം കഴിച്ചിരുന്നത്. രണ്ടുമാസം മുൻപായിരുന്നു ഇവർ തമ്മിൽ വേർപിരിഞ്ഞത്.
2006ൽ ആയിരുന്നു ഷൊയ്ബ് മാലിക്കിന്റെ ആദ്യവിവാഹം. അയേഷ സിദ്ധിഖി ആയിരുന്നു അദ്ദേഹത്തിന്റെ ആദ്യ വധു. പിന്നീട് 2010ലാണ് ഷൊയ്ബ് ഇന്ത്യൻ ടെന്നിസ് താരം സാനിയ മിർസയെ വിവാഹം കഴിക്കുന്നത്. ഇവർക്ക് അഞ്ച് വയസ്സുകാരനായ ഒരു മകനും ഉണ്ട്. ഏതാനും മാസങ്ങൾക്കു മുൻപാണ് ഷൊയ്ബ് മാലിക്കും സാനിയ മിർസയും തമ്മിൽ വേർപിരിയുന്നു എന്ന രീതിയിലുള്ള അഭ്യൂഹങ്ങൾ പ്രചരിക്കാൻ ആരംഭിച്ചത്.
Discussion about this post