ന്യൂഡൽഹി : പ്രധാനമന്ത്രിയുടെ പരീക്ഷ പേ ചർച്ചയ്ക്ക് ആദ്യമായി ഒരു മലയാളി പെൺകുട്ടി അവതാരകയാകുന്നു. കോഴിക്കോട് ഈസ്റ്റ് ഹിൽ കേന്ദ്രീയ വിദ്യാലയത്തിലെ പതിനൊന്നാം ക്ലാസ് വിദ്യാർത്ഥിനിയായ മേഘ്ന എൻ നാഥ് ആണ് ഈ നേട്ടം കൈവരിച്ചിരിക്കുന്നത്. രാജ്യത്തെ എല്ലാ വിദ്യാർത്ഥികൾക്കും ആയി പ്രധാനമന്ത്രി നയിക്കുന്ന ദേശീയ പരിപാടിയാണ് പരീക്ഷ പേ ചർച്ച.
പരീക്ഷകളെ എങ്ങനെ നേരിടണം, പരീക്ഷയുമായി ബന്ധപ്പെട്ട് ഉണ്ടാകുന്ന സമ്മർദ്ദങ്ങളെ എങ്ങനെയൊക്കെ അഭിമുഖീകരിക്കാം തുടങ്ങിയ വിഷയങ്ങളിൽ രാജ്യത്തിന്റെ വിവിധ സംസ്ഥാനങ്ങളിൽ നിന്നുള്ള കുട്ടികൾ പ്രധാനമന്ത്രിയുടെ ഉപദേശം തേടുകയും സംവാദങ്ങളിൽ ഏർപ്പെടുകയും ചെയ്യുന്ന പരിപാടിയാണ് പരീക്ഷ പേ ചർച്ച. നേരിട്ടും ഓൺലൈനായും രാജ്യത്തെ ലക്ഷക്കണക്കിന് വിദ്യാർഥികൾ ഈ പരിപാടിയിൽ പങ്കെടുക്കാറുണ്ട്.
കഴിഞ്ഞ ആറു വർഷങ്ങളിലായി പരീക്ഷാ പേ ചർച്ച നടന്നുവരുന്നുണ്ട് എങ്കിലും ആദ്യമായാണ് ഒരു മലയാളി വിദ്യാർത്ഥിനി അവതാരകയായി എത്തുന്നത്. മേഘ്നയോടൊപ്പം വാരാണസിയിൽ നിന്നുള്ള അനന്യ ജ്യോതി എന്ന വിദ്യാർത്ഥിനിയും ഈ തവണത്തെ പരീക്ഷ പേ ചർച്ചയുടെ അവതാരകയായി ഉണ്ടാകും. പരിപാടി നിയന്ത്രിക്കുന്നതിനുള്ള പരിശീലനങ്ങൾക്കായി മേഘ്ന ഡൽഹിയിലേക്ക് യാത്രയായിരിക്കുകയാണ്.
Discussion about this post