എറണാകുളം : വാഹനം പാർക്ക് ചെയ്യുന്നതുമായി ബന്ധപ്പെട്ട തർക്കത്തെ തുടർന്ന് യുവാവിന്റെ അടിയേറ്റ മധ്യവയസ്കൻ മരണപ്പെട്ടു. കാഞ്ഞിരമറ്റം ആമ്പല്ലൂർ സ്വദേശി സുരേഷ് ആണ് മരണപ്പെട്ടത്. സുരേഷിനെ ഇരുമ്പു വടി കൊണ്ട് തലയ്ക്ക് അടിച്ച പ്രതി മുഹമ്മദ് അലിയെ പോലീസ് അറസ്റ്റ് ചെയ്തു.
ഈ മാസം പതിനാലാം തീയതി ആയിരുന്നു കേസിനാസ്പദമായ സംഭവം നടന്നത്. കാഞ്ഞിരമറ്റം ആമ്പല്ലൂരിൽ വച്ചാണ് ആമ്പല്ലൂർ സ്വദേശിയായ സുരേഷിനെ കോഴിക്കോട് സ്വദേശിയായ മുഹമ്മദ് അലി ഇരുമ്പ് വടി കൊണ്ട് തലയ്ക്ക് അടിച്ചു പരിക്കേൽപ്പിച്ചത്. വാഹനം പാർക്ക് ചെയ്യുന്നതുമായി ബന്ധപ്പെട്ടിട്ടുണ്ടായ തർക്കമാണ് ആക്രമണത്തിന് കാരണമായത്. അടികൊണ്ട് സുരേഷ് തൽക്ഷണം കുഴഞ്ഞു വീഴുകയായിരുന്നു.
കോട്ടയം മെഡിക്കൽ കോളേജ് ആശുപത്രിയിൽ ചികിത്സയിൽ കഴിഞ്ഞു വരവേ ഇന്ന് വൈകിട്ടാണ് സുരേഷിന്റെ മരണം സംഭവിക്കുന്നത്. വെന്റിലേറ്ററിന്റെ സഹായത്തോടെയായിരുന്നു ഇത്രയും ദിവസം സുരേഷിന്റെ ജീവൻ നിലനിർത്തിയിരുന്നത്. മുഹമ്മദ് അലിയുടെ അടികൊണ്ട് സുരേഷ് താഴെ വീഴുന്ന രംഗങ്ങൾ സിസിടിവി ദൃശ്യങ്ങളിൽ നിന്നുമാണ് പോലീസ് കണ്ടെത്തിയത്. തുടർന്നാണ് കോഴിക്കോട് സ്വദേശിയായ മുഹമ്മദ് അലിയെ പോലീസ് അറസ്റ്റ് ചെയ്തത്.
Discussion about this post